Psıhıkalyq aýytqýy bar adam qandaı jaǵdaıda májbúrlep emdeýge jiberiledi

ASTANA. KAZINFORM — Astanada bolǵan oqıǵadan keıin Kazinform tilshisi minez-qulqynda psıhıkalyq buzýshylyq bar balalar men jasóspirimderge kórsetilip jatqan sharalarǵa sholý jasady.

Qalalyq densaýlyq saqtaý basqarmasynyń málimetinshe, búginde Astanada 5252 kámeletke tolmaǵan bala psıhıatr-dárigerdiń dınamıkalyq baqylaýynda tur. 

Erejege sáıkes, psıhıatr-dáriger balanyń jaǵdaıyn keminde aıyna bir ret qaraýy tıis. Alaıda, vedomstvoda patsıentterdiń qandaı jaǵdaıda statsıonarlyq emdeýge jiberiletini naqtylanbaǵan.

— Psıhıkalyq aýytqýy bar adamdy dınamıkalyq baqylaý máseleler «Halyq densaýlyǵy jáne densaýlyq saqtaý júıesi týraly» kodeksi baptarymen jáne Densaýlyq saqtaý mınıstrliginiń «Psıhıkalyq densaýlyq salasynda medıtsınalyq-áleýmettik kómek kórsetýdiń keıbir máseleleri týraly» buıryǵymen retteledi, — degen jaýap aldyq agenttik joldaǵan resmı saýalǵa.

Minez-qulqynda aýytqýy bar patsıent psıhıatrııalyq statsıonardan shyqqannan keıin qabyldanatyn sharalar: 

1. psıhıatr-dáriger patsıentti dınamıkalyq baıqaýdy júzege asyrý qajettigi, qarap-tekserý júrgizýdiń tizbesi, kólemi, kezeńi, zerthanalyq zertteýler men baıqaý merzimi týraly aqparat beredi; 
2. jazbasha kelisim bolǵan jaǵdaıda psıhıkalyq aýytqýy bar janǵa dınamıkalyq baıqaý belgilenedi; 
3. psıhıkalyq aýytqýy bar adam nemese onyń zańdy ókili kelisimnen bas tartqan jaǵdaıda, másele dárigerlik-konsýltatsııalyq komıssııanyń qaraýyna jiberiledi;
4. psıhıkalyq aýytqýy bar adamdy dınamıkalyq baıqaýǵa alǵan kezde patsıentti qarap tekserýdi júrgizedi, baıqaý men tekserýdiń ýaqytyn, densaýlyq saqtaý salasynda arnaýly áleýmettik qyzmetter kórsetýdi uıymdastyrý qajettigi aıqyndalady jáne emdeýdiń jeke jospary men ońaltý baǵdarlamasy jasalady; 
5. dıagnostıkalyq zertteýlerdiń nátıjesine, beıindi mamandardyń qorytyndylary men usynymdaryna arasynda tekserý jáne baǵalaý júrgiziledi; 
6. qajet bolǵan jaǵdaıda túzetýler engize otyryp, emdeý, ońaltý (reabılıtatsııalyq) is-sharalarynyń tıimdiligine monıtorıng pen baqylaýdy júzege asyrylady; 
7. naqty aıǵaqtar bolǵan kezde qujattardy jáne medıtsınalyq-áleýmettik saraptamaǵa, medıtsınalyq-áleýmettik ońaltýǵa, statsıonardy almastyratyn, statsıonarlyq, onyń ishinde májbúrlep emdeýge jiberý rásimdeledi; 
8. densaýlyq saqtaýdyń beıindi mamandarynyń keńesine, qajetti zerthanalyq jáne aspaptyq tekserýlerge, psıhologtyń qaraýyna, áleýmettik qyzmetkerdiń jáne ózge de mamandardyń konsýltatsııasyna jiberedi;
9. dáriger-psıholog turǵylyqty jeri boıynsha psıhıkalyq aýytqýy bar adamǵa barady;
10. medıtsınalyq-áleýmettik kómek kórsetý deńgeıleriniń, sharttary men túrleriniń sabaqtastyǵyn júzege asyrady;
11. patsıent týraly barlyq derek elektrondyq densaýlyq saqtaý júıesinde jazylady.

Eske sala ketsek, elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan. 

Dárigerler zardap shekken balaǵa dereý ota jasap, psıhologııalyq kómek kórsetti.

Sondaı-aq elordalyq dárigerler jasóspirimniń pyshaqpen shabýylyna ushyraǵan 5 jasar balaqaıdyń jaǵdaıy aýyr ekenin aıtqan edi.