Psıhıatrǵa qashan júgingen jón: maman alańdatarlyq belgilerdi atady
ALMATY. KAZINFORM — Psıhıkalyq densaýlyq ortalyǵy dırektorynyń orynbasary, Almaty qalasynyń bas shtattan tys psıhıatry Nabı Esimov adamǵa qandaı jaǵdaılarda psıhıatr keńesi qajet ekenin túsindirdi.
Onyń sózinshe, adamdar psıhıatrǵa ártúrli jaǵdaımen júginedi. Olardyń qatarynda aýyr psıhıkalyq aýrýlar ǵana emes, mazasyzdanyp, kúızeliske tap bolǵan, uıqysy buzylyp, qatty kúızeliske ushyraǵandar da bar.
— Psıhıatrǵa joldama alý avtomatty túrde aýyr psıhıatrııalyq dıagnoz qoıylady, aýrýhanaǵa jatqyzady nemese psıhıatrııalyq klınıkada esepke alynady degendi bildirmeıdi. Psıhıatrdyń keńesi — eń aldymen adamnyń jaǵdaıyn baǵalap, onyń boıyndaǵy belgilerdi anyqtap, medıtsınalyq kómek qajet pe, joq pa ekenin belgileýge múmkindik beredi, — dedi Nabı Esimov.
Aıtýynsha, adamnyń psıhologııalyq jaǵdaıynyń kúndelikti ómirine qanshalyqty áser etetini de mańyzdy krıterıı sanalady. Eger emotsııalyq jaǵdaı adamnyń jumysyna, oqýyna, jaqyndarymen qarym-qatynasyna nemese ádettegi belsendiligine kedergi keltire bastasa, bul kásibı kómekke júginýge sebep bolýy múmkin.
Alańdatatyn belgilerdiń qatarynda uzaq ýaqyt boıy kóńil-kúıdiń túsýi nemese mazasyzdyq, buryn unaıtyn isterge degen qyzyǵýshylyqtyń joǵalýy, qatty ashýshańdyq, uıqy men tábettiń buzylýy, zeıin qoıý qabileti men jumysqa degen qabilettiń tómendeýi bar. Sondaı-aq qatty mazasyzdyq nemese úreı ustamalary, áleýmettik oqshaýlaný, minez-qulyq pen kóńil-kúıdiń kúrt ózgerýi de psıhıatrdyń keńesine júginýge sebep bolýy múmkin.
— Adam ózi másele retinde qabyldamaıtyn ózgeristerge de erekshe nazar aýdarý qajet. Ádetten tys senimderdiń paıda bolýy, shamadan tys kúdikshildik osyǵan jatady. Taǵy bir alańdatatyn belgi — kúızelis pen emotsııalyq qıyndyqty jeńý tásili retinde alkogoldi nemese basqa da psıhobelsendi zattardy qoldaný, — dep túsindirdi maman.
Nabı Esimov mundaıda jaǵdaıdyń asqynýyn kútpeýge keńes berdi. Onyń aıtýynsha, adam neǵurlym erterek kómekke júginse, soǵurlym qoldaýdyń tıimdi tásilin tańdap, jaǵdaıdyń odan ári nasharlaýyna jol bermeý múmkindigi joǵary bolady.
— Ólim nemese ózine qol jumsaý týraly oıdyń paıda bolýy — asa qaýipti belgi. Mundaı jaǵdaı ózdiginen ótip ketedi dep kútýge bolmaıdy. Múmkindiginshe tez arada kásibı kómekke júginý qajet, — dep atap ótti ol.
Eske salaıyq, Atyraýda psıhıkalyq densaýlyǵyna baılanysty esepke alynǵandar sany artqan.
