Provızorlyq statsıonardan qashpaq bolǵan tarazdyqtyń áreketi qaıǵyly aıaqtaldy
TARAZ. QazAqparat – Jambyl oblysynda provızorlyq statsıonarda jatqan adamnyń jónsiz áreketi qaıǵyly jaǵdaıǵa ákep soqty, dep habarlaıdy QazAqparat Jambyl oblystyq polıtsııa departamentiniń baspasóz qyzmetine silteme jasap.
21 sáýir kúni provızorlyq statsıonarǵa jedel respıratorly aýrý, koronavırýs ınfektsııasyna kúdikpen ishimdikke toıyp alǵan naýqas tústi. Ony «Aýyl-Bereke» bazarynyń mańynda es-tússiz jáne mas kúıinde jatqan jerinen jedel járdem toby emhanaǵa jetkizgen. Temparatýrasy 38 gradýsqa deıin kóterilgen azamattan KVI ınfektsııasyna qan taldaýy alynyp, naýqas aýrýhanaǵa jatqyzyldy, qajetti em-shara jasaldy. Sonymen qatar, onyń narkologııalyq esepte turǵany, ishimdikke áýes ekeni jáne buryn sottalǵany anyqtaldy.
22 sáýir kúni tańerteń oıanǵan er adam ashýly boldy. Palatada medbıke men sanıtardy ıterip jiberip, jasyryn túrde medıtsınalyq mekemeden qashyp ketpekke áreket jasaıdy. Ol ekinshi qabat terezesiniń jaqtaýyna shyqqan bette abaısyzda asfaltqa qulap ketken. Reanımatsııalyq áreketter kómektespedi, naýqas kóz jumdy.
Medıtsına mekemesiniń habarlaýynsha, koronavırýs ınfektsııasyna tapsyrylǵan qan taldaýy teris nátıje kórsetken.
