«Protondy» áli ushyrýǵa bolmaıdy - mınıstr N. Qapparov

ASTANA. 11 qyrkúıek. QazAqparat - «Proton» apaty bolǵan jerde zalalsyzdandyrý jumystary tolyǵymen aıaqtalmaıynsha, osy úlgidegi zymyrantasyǵyshtardy ushyrýǵa bolmaıdy. Búgin apatty joıý boıynsha qurylǵan arnaıy jumys tobynyń otyrysynda QR Qorshaǵan ortany qorǵaý mınıstri Nurlan Qapparov osylaı aıtty.

Onyń habarlaýynsha, zalalsyzdandyrý jumystary bastalǵaly beri apat bolǵan jerdegi ýly zattardyń shekti kontsentratsııasy myń esege tómendetildi. «Búginde zalalsyzdandyrýdyń úshinshi kezeńinen keıin kontsentratsııanyń deńgeıi 9,2 esege artyq bolyp tur. Sonda da bul norma kóp bolyp sanalady. Biz ol kórsetkishti qalypty deńgeıge deıin tómendetýimiz kerek. Sondyqtan zalalsyzdandyrý jumystary tolyǵymen aıaqtalmaıynsha, kelesi «Protondy» ushyrý týraly áńgimeni qozǵaýdyń ózi qısynsyz», - dep atap kórsetti N.Qapparov. Komıssııa otyrysyna «Roskosmos» federaldyq ǵarysh agenttigi basshysynyń orynbasary Sergeı Savelev te qatysty. Onyń aıtýynsha, Qazaqstannyń búgingi ustanymyna baılanysty kezekti «Proton» zymyrantasyǵyshyn ushyrý keıinge qalatyn boldy. S. Savelev onyń naqty ýaqytyn aıtqan joq. Aıta keteıik, buǵan deıin Roskosmos «Proton» úligisindegi kezekti zymyrantasyǵyshty ushyrýdy 17 qyrkúıekke belgilegen bolatyn.