«Proton-M» zymyranynyń apaty Qazaqstan aýmaǵynan tys jerde oryn aldy - «Qazǵarysh»

ASTANA. QazAqparat - Búgin túnde Baıqońyr ǵarysh aılaǵynan Astana ýaqyty boıynsha saǵat 03.42-de ushyrylǵan «Proton-M» zymyran-tasyǵyshy orbıtaǵa «Ekspress-AM4R» ǵarysh apparatyn alyp shyǵa almady.

Osyǵan deıin habarlanǵandaı, ol ushyrylǵannan keıin 540-shi sekýndta kútpegen jaǵdaı oryn alǵan: zymyran-tasyǵyshtyń 3-satysynyń qozǵaltqyshy apatty túrde isten shyǵyp, saldarynan ǵarysh kemesimen baılanys úzildi.

«Qazǵarysh» tóraǵasynyń orynbasary Erkin Shaımaǵambetovtiń habarlaýynsha, «Ekspress-AM4R» serigin shyǵarýǵa baılanysty týyndaǵan shuǵyl jaǵdaı týraly Baıqońyrdaǵy Reseıdiń Jerústi ǵarysh ınfraqurylymyn paıdalaný ortalyǵynyń basshylyǵy QR Ulttyq ǵarysh agenttigine dereý habarlaǵan.

JǴIPO-nyń aqparattyq habarlamasynda «Proton-M» zymyran-tasyǵyshynyń 3-satysynyń apattyq isten shyǵýy Qazaqstan aýmaǵynan tys jerde oryn alǵany atap ótilgen.

«Baıqońyrdan ushyrylý shtatty boldy, sonymen birge ǵarysh kemesiniń birinshi satysy shtatty rejımde Qaraǵandy oblysynyń ústinen ushyp bara jatqanda ajyrady. Zymyrannyń ekinshi satysy Reseıdiń Altaı ólkesiniń ústinde ajyrap, Tynyq muhıtynyń ústinde úshinshi satysynyń ajyraýy kezinde apat oryn aldy», - dep túsindirdi jaǵdaıdy E.Shaımaǵambetov. Ol Qazaqstan ekologııasyna eshqandaı zııan kelmegenin atap ótti.

«Reseıǵaryshtyń» baspasóz qyzmetiniń aqparaty boıynsha, arnaıy qurylǵan komıssııanyń ókilderi qazir telemetrıkalyq aqparatty saraptap, apattyń oryn alý sebepterin anyqtap jatyr.