Protezden bastap sanatorııge deıin: «Áleýmet» portaly qandaı múmkindik beredi
ASTANA. KAZINFORM — Múgedektigi bar adamdarǵa 9 aıda 463 myńnan astam qyzmet kórsetildi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
2026 jyldyń alǵashqy toǵyz aıynda «Áleýmet» áleýmettik qyzmetter portaly arqyly múgedektigi bar adamdarǵa ońaltý quraldary men qyzmetterin usyný boıynsha 463 205 qyzmet kórsetildi.
QR Eńbek jáne halyqty áleýmettik qorǵaý mınıstrligi azamattardyń qajetti ońaltý quraldary men qyzmetterin óz betinshe tańdaýyna múmkindik beretin portaldy damytýdy jalǵastyryp keledi. Paıdalanýshylar qajetti quraldar men qyzmet kórsetýshilerdi ózderiniń jeke abılıtatsııalaý jáne ońaltý baǵdarlamasyna sáıkes tańdaı alady.
— Kórsetilgen qyzmetterdiń ishinde 330 300-i ońaltýdyń tehnıkalyq quraldarymen qamtamasyz etýge, 8 600-i ymdaý tili mamanynyń qyzmetine, 27 400-i jeke kómekshiniń qyzmetine, al 96 905-i sanatorıı-kýrorttyq emdelýge tıesili. 2026 jyldyń toǵyz aıynda portalda 75 062 adam belsendi qyzmet alýshy retinde tirkeldi. Sonymen qatar osy kezeńde 11 285 taýar tirkelgen. Qazirgi ýaqytta portalda ońaltýdyń tehnıkalyq quraldaryn usynatyn 690 jetkizýshi bar. Onyń 433-i esepti kezeńde tirkeýden ótken, — delingen habarlamada.
Portal arqyly protezdik-ortopedııalyq buıymdarǵa, estý jáne kórý qabileti buzylǵan adamdarǵa arnalǵan arnaıy quraldarǵa, júrip-turý quraldaryna jáne mindetti gıgıenalyq quraldarǵa tapsyrys berýge bolady. Sondaı-aq jeke kómekshiniń, ymdaý tili mamanynyń qyzmetin jáne sanatorıı-kýrorttyq emdelýdi tańdaýǵa múmkindik bar.
Paıdalanýshylar jetkizýshilerdiń usynystaryn qarap, taýarlardyń sıpattamalaryn salystyryp, ózderine qolaıly nusqany tańdaı alady. Bul rette tańdalǵan quraldar men qyzmetter adamnyń jeke abılıtatsııalaý jáne ońaltý baǵdarlamasynda qarastyrylýy kerek. Tapsyrys berý jáne qajetti qujattarǵa qol qoıý elektrondyq tsıfrlyq qoltańba arqyly onlaın júzege asyrylady.
Azamattarǵa aqparattyq qoldaý kórsetý maqsatynda Aidana chat-boty jumys isteıdi. Ol portaldyń jumys isteý tártibi men normatıvtik-quqyqtyq aktiler týraly málimet berip, jıi qoıylatyn suraqtarǵa jaýap usynady.
Portaldy paıdalaný kezinde kómekke muqtaj azamattar jergilikti áleýmettik qorǵaý organdary janyndaǵy ózine-ózi qyzmet kórsetý buryshtaryna júgine alady. Mamandar qajetti ońaltý quraldaryn tańdaý jáne olarǵa tapsyrys berý tártibin túsindiredi.
Aıta keteıik, «Áleýmet» portaly qyzmet alýshylar men jetkizýshilerdi tikeleı baılanystyryp, azamattardyń óz qajettilikterine sáıkes ońaltý quraldary men qyzmetterin tańdaý múmkindikterin keńeıtedi. Portaldy aleumet.egov.kz saıty arqyly paıdalanýǵa bolady.
Osydan buryn Ulytaý oblysynda 9 myńnan astam turǵyn birjolǵy áleýmettik tólemnen qaǵylǵanyn jazǵanbyz.
