Protezdi daıyndaý qansha ýaqyt alady jáne ony kimder tegin ala alady
ASTANA. KAZINFORM – QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyn damytýdyń ulttyq ǵylymı ortalyǵynda 2026 jyldyń úsh toqsanynda protezdik-ortopedııalyq kómek alý úshin 280 adam júgingen.
Olardyń 185-i jol-kólik oqıǵalary, óndiristik jáne turmystyq jaraqattar, sondaı-aq aıaq-qoldyń ampýtatsııasyna ákep soqqan aýrýlar saldarynan protezdeýdi qajet etken.
Ortalyqta protezdeý jumystary em alýshyny tekserýden, protezdi tańdaý men daıyndaýdan, ony adamnyń jeke erekshelikterine qaraı beıimdeýden jáne paıdalanýdy úıretýden turady. Ár kezeńde mamandar patsıenttiń densaýlyq jaǵdaıyn, fızıkalyq belsendiligin jáne kúndelikti ómirdegi qajettilikterin eskeredi.
Ortalyqta em alyp jatqan adamdardyń biri – jol-kólik oqıǵasynan keıin eki aıaǵynan aıyrylǵan Almaty qalasynyń 38 jastaǵy turǵyny. Otadan soń oǵan ózdiginen júrip-turýdy jáne kúndelikti turmystaǵy úırenshikti áreketterdi qaıta meńgerýge týra kelgen.
Tekserý nátıjesinde mamandar patsıentke san jáne aıaq protezderin tańdaǵan. Atap aıtqanda, mıkroprotsessorlyq tize modýli bar san protezi qoldanylǵan. Protezder daıyndalyp, jeke ólshemderine saı beıimdelgennen keıin em alýshy júrýdi úırene bastaǵan.
-Alǵashynda jańa jaǵdaıǵa úırený ońaı bolǵan joq. Men úshin eń bastysy – qaıtadan óz betimmen júrip úırený edi. Mamandar ár kezeńdi túsindirip, protezge beıimdelýime kómektesti. Qazir óz betimmen júrip-tura alamyn, kúndelikti jumystarymdy atqaryp, sportpen de aınalysamyn, – dedi patsıent.
Em alýshylarmen ortoped dáriger, ınjener-tehnolog, protez jasaýshy mehanık jáne ońaltý mamanynan quralǵan komanda jumys isteıdi. Ortoped dáriger adamnyń densaýlyq jaǵdaıyn, tuqyldyń erekshelikterin jáne fızıkalyq belsendilik deńgeıin baǵalaıdy. Injener-tehnolog protezdiń tehnıkalyq parametrlerin anyqtasa, protez jasaýshy mehanık ony daıyndap, jeke ólshemderge saı keltiredi. Al ońaltý mamany patsıentke protezdi paıdalanýdy, onymen júrýdi úıretip, qozǵalys belsendiligin birtindep arttyrýǵa kómektesedi.
-Ár patsıent Ortalyqqa óz tarıhymen jáne jeke erekshelikterimen keledi. Protezdi tańdaý kezinde biz medıtsınalyq kórsetkishterdi ǵana emes, adamnyń qanshalyqty belsendi ekenin, kúndelikti ómirde qandaı mindetter atqaratynyn da eskeremiz. Eń bastysy – protez yńǵaıly, fýnktsıonaldy ári em alýshynyń múmkindikterine saı bolýy kerek, – dep atap ótti Ortalyqtyń protezdik-ortopedııalyq kómek kórsetý baǵytyna jetekshilik etetin bas dırektordyń orynbasary Ýsama Abý Djazar.
Ortalyqta zamanaýı tize modýlderi, sılıkondy qaptamalar, kómirtekti talshyqtan jasalǵan tabandar jáne basqa da qosalqy bólshekter qoldanylady. Olar patsıenttiń jeke kórsetkishterine qaraı tańdalady. Sonymen qatar Ortalyq buryn daıyndalǵan protezderdi jóndeý, jańǵyrtý jáne qaıta beıimdeý jumystaryn da júrgizedi.
Memlekettik bıýdjet esebinen protezdik-ortopedııalyq kómek zańnamada kózdelgen quqyq bolǵan jáne Abılıtatsııalaý men ońaltýdyń jeke baǵdarlamasynda tıisti usynymdar kórsetilgen jaǵdaıda usynylady. Qujattardy rásimdeý úshin turǵylyqty jerdegi jumyspen qamtýdy úılestirý jáne áleýmettik baǵdarlamalar basqarmasyna nemese halyqqa qyzmet kórsetý ortalyǵyna (HQKO) júginýge, sondaı-aq eGov.kz portalynyń qyzmetterin paıdalanýǵa bolady.
Áleýmettik qyzmetter portaly arqyly ónim berýshini tańdaý múmkindigi de qarastyrylǵan. Portal arqyly tapsyrys berilgen jaǵdaıda buıymnyń quny kepildik berilgen soma sheginde óteledi. Eger tańdalǵan buıymnyń baǵasy belgilengen somadan asyp ketse, aıyrmasyn alýshy óz qarajaty esebinen tóleıdi.
Qujattar rásimdelip, ónim berýshi tańdalǵannan keıin patsıent konsýltatsııadan jáne medıtsınalyq-tehnıkalyq komıssııadan ótedi. Komıssııa qajetti protez túrin anyqtaıdy. Ortalyqtyń málimetinshe, buıymdy daıyndaý jáne jeke ólshemderge saı keltirý ádette 5 kúnnen 15 kúnge deıin sozylady. Odan keıin mamandardyń kómegimen em alýshy protezdi kúndelikti ómirde paıdalanýdy meńgeredi.
Aıta keteıik, 2026 jyldyń alǵashqy toǵyz aıynda «Áleýmet» áleýmettik qyzmetter portaly arqyly múgedektigi bar adamdarǵa ońaltý quraldary men qyzmetterin usyný boıynsha 463 205 qyzmet kórsetildi.
