Proportsıonaldy saılaý júıesi nege tıimdi – depýtat túsindirdi
ASTANA. KAZINFORM – «Quryltaı» dep atalatyn Parlamentte 145 depýtat qyzmet etedi. Onyń tıimdiligi nede? Halyqaralyq tájirıbeler ne deıdi? QR Parlamenti Májilisiniń depýtaty Elnur Beısenbaev JJ Studio-da jaýap berdi.
– Konstıtýtsııalyq qurylymy, jer kólemi bizden áldeqaıda kishirek, Portýgalııa, Bolgarııa sııaqty 10 mıllıonǵa jýyq halqy bar memleketterde 250 depýtat qyzmet etedi. Sol sebepti meniń oıymsha, Qazaqstandaǵy depýtattardyń sany mobıldi, búgingi Qazaqstannyń saıasatyna saı keletin san dep esepteımin, – deıdi spıker.
Stýdııa qonaǵy depýtattyq korpýstaǵy qyzmetkerler sany nege naqty 145 bolyp bekitiletinin túsindirdi.
– Taǵy bir dúnıeni aıtý kerek. Depýtattardyń sany – 145. Taq san bolǵany da tıimdi. Óıtkeni 50 paıyz daýys jınalǵan ýaqytta sońǵy daýys sheshýshi ról oınaıdy. ıAǵnı sheshim qabyldaýǵa jeńilirek bolady. Qazir 8 komıtettiń 7-eýi jumys istep jatyr. Múmkin, keı komıtetterdi qosý kerek bolar. Al keıbirine tsıfrlandyrý, aımaqtyq máselelerdi qosý arqyly keńeıtýge múmkindik bar, – deıdi ol.
Halyq qalaýlysy jańa júıeniń ashyqtyq pen ádilettilikti arttyratynyna senim bildirip otyr.
– Memleket basshysy Qazaqstannyń joǵarǵy zań shyǵarýshy bıligi proportsıonaldy júıe negizinde, ıaǵnı tek partııalyq tizim arqyly jasaqtalýy tıis ekenin atap ótti. Bul tásil qazirgi tańda álemdik trendke jáne damyǵan Eýropa memleketteriniń parlamenttik tájirıbesine tolyqtaı saı keledi. Atalǵan júıe bılikke bir adamnyń nemese bir sáttik emotsııanyń áserimen kelýine jol bermeıdi. Kerisinshe, partııa sııaqty qoǵamdyq ınstıtýttardyń rólin kúsheıtedi. Mundaı ınstıtýttardyń ishinde tepe-teńdik pen tejemelik tetikter jumys isteıdi, al sheshimder jeke tulǵa deńgeıinde emes, ujymdyq túrde qabyldanady. Osy turǵydan alǵanda, partııalyq uıymdardyń joǵarǵy zań shyǵarýshy organda jumys isteýi qısyndy ári negizdi. Bul óz kezeginde ádiletsiz nemese zańsyz sheshimderdiń qabyldaný qaýpin tómendetip, saıası júıeniń turaqtylyǵy men jaýapkershiligin arttyrýǵa múmkindik beredi, – deıdi depýtat.
Aıta keteıik, Prezıdent jańa Parlamentke «Quryltaı» degen ataý berýdi usyndy.