Promoýter Nelson Lopes: Qanat qazir naǵyz babynda
ASTANA. QazAqparat - Kásipqoı boks áleminde Qazaqstannyń kók týyn jelbiretip júrgen boksshy Qanat Islamnyń promoýteri Nelson Lopes boks áleminde ataǵy bar «Qazaqtyń» aldaǵy jekpe-jegi men daıyndyǵy týraly aıtyp berdi, dep habarlaıdy «QazAqparat» HAA tilshisi.
Promoýterdiń aıtýynsha, Qanat Islam qazir naǵyz babyna kelgen, sharshy alańda kez kelgen boksshymen shyǵýǵa ázir. Osy sebepti «juldyzdy» kásipqoı boksshylar onymen shyǵýǵa batyly bara bermeıtin kórinedi.
«Qanat 12 raýndtyń bárine daıyn. Naǵyz babynda. Álemdik ataǵy bar kóptegen boksshylar onymen sharshy alańǵa shyqqysy kelmeıdi. Biz Erıslandı Laranyń promoýterimen kelissóz júrgizip jatyrmyz. Biraq Lara Qanat úshin yńǵaıly qarsylas dep aıta almaımyn. Lara kóbinese qorǵanystyń boksshysy. Ondaılar qansha jeńiske jetkenimen juldyz bola almaıdy», - deıdi Nelson Lopes.
Promoýter Qanattyń sońǵy kezdesýleri týraly saýaldarǵa da jaýap berdi. Nelsonnyń sózine súıensek, joǵaryda aıtylǵandaı «Qazaqqa» sońǵy kezderi ylǵı «qorǵanystyń boksshylary» kezdesip qalyp júrgen.
«Qanat nege birinshi raýndta qarsylasyn qulatpaıdy, nege nokaýt joq dep aıtyp jatqandar bar. Olaı aıtatyndar bokstyń qyr-syryn bilmeıtin adamdar. Bizdiń maqsatymyz - birinshi raýndta qulatý emes. Qanat ózin barynsha ustaı biledi. Áýesqoı bokstaǵylar 3 raýndqa baryn salady. Ál qazirgi tańda Qanattyń kásipqoı boksta júrgenin eskerý kerek. Eger bar kúsh-qýatyn alǵashqy tórt raýndqa salyp jiberip, dittegen maqsatyna jete almaı qalsa, ary qaraı ne bolady? Sondyqtan, Qanat kúshin 12 raýndqa barynsha teń bólýi tıis», - deıdi ol.
Nelson Lopes búgingi kúni bastysy aqshaǵa emes, Qanattyń ımıdjin kóterýge kóptep kúsh salyp jatqanyn atap ótti. Onyń aıtýynsha, «Qazaqtyń» promoýterlik taraby bireýdiń shartyn qabyldaıtyndaı emes, shart qoıa biletindeı dárejege jetýi kerek.
«Aqsha tóleseń kez kelgen boksshy kez kelgen álemniń núktesine barady. Aqsha dep edi, Meıvezer Makgregormen shyǵyp ketti ǵoı. Myqtylar ózderiniń sharttaryn qoıady. Bizdiń maqsat - esepsiz tóbelestire berý emes, qazaqstandyq boksshylardy kóterý. Toqsanynshy jyldardan beri qazaqstandyq boksshylardy baqylap júrmin. Segiz boksshymen jumys istedim. Meniń armanym - kezdesýdi bizdiń sharttarmen ótkizý», - dep túıdi Nelson Lopes.
Eske sala ketsek, 9 qyrkúıekte Astanadaǵy «Saryarqa» velotregi ǵımaratynda Qanat Islam (24-0, 19KO) kanadalyq Brendon Kýkpen (18-0, 11KO) judyryqtasady. Boksshylar birinshi orta salmaqtaǵy IBF tıtýlyna úmitkerlik úshin talasady. Osy jekpe-jektiń anderkartynda 8 qazaqstandyq boksshy óner kórsetedi. Olar - Jańqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0, 2KO), Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev (2-0, 1KO). Barlyq boksshylarymyz osy ýaqytqa deıin birde-bir ret jeńilmegen.
