Promoýter Gennadıı Golovkınge laıyqty qarsylas bolatyn jas boksshyny atady
ASTANA. QazAqparat - Promoýter jáne burynǵy boksshy Barrı Makgýıgan 2018 jyldyń mamyr aıynda ótýi múmkin Gennadıı Golovkın (37-0-1, 33 KO) men meksıkalyq Saýl Alvarestiń (49-1-2, 34 KO) qarymta kezdesýi týraly óz pikirin bildirdi, dep habarlaıdy QazAqparat Sports.kz portalyna silteme jasap.
Makgýıgan ırlandııalyq Bıllı Djo Sondersti (26-0, 12 KO) Golovkın men Alvarestiń qarsylasy dep sanamaıtynyn aıtty.
«Golovkın-Alvares kezdesýiniń jeńimpazy Bıllı Djo Sonderspen kezdesýi múmkin. Sonders mundaı iri aıqasqa shyǵý quqyǵyn ıelense de, jigitter orta salmaqta Sondersten emes, 69,9 keliden aýysyp kelgen Jermall Charlodan qaýiptengenderi jón», - dedi promoýter Mirror basylymyna bergen suhbatynda.
Bir jyl buryn Charlo (26-0, 20 KO) birinshi orta salmaqtaǵy IBF chempıony ataǵyn úshinshi ret qorǵady, onyń 5-raýndynda Djýlıan Ýılıamsty nokaýtqa jiberdi. Keıinirek, ataqty qaldyryp, 72,6 keli salmaqqa aýysty jáne jazǵy aıqasta Horhe Heılandty tórt raýnda-aq esten tandyrǵan bolatyn.
Aıta keteıik, kásipqoı boks áleminde amerıkalyq aǵaıyndy egizder rıgke shyǵyp júr. Olardyń biri - birinshi orta salmaqtaǵy IBF burynǵy chempıony Jermall Charlo (26-0, 20 KO) bolsa, ekinshisi - birinshi orta salmaqtaǵy WBC belbeýiniń ıegeri Jermell Charlo (30-0, 15 KO). Olardyń esimderindegi bir áriptiń ózgesheliginen óz arasynda «a-Charlo» jáne «e-Charlo» dep atap ketken.
