Promoýter Bob Arým: Jánibek Álimhanuly - Golovkınniń izbasary
NUR-SULTAN. QazAqparat - «Top Rank» promoýterlik kompanııasynyń basshysy Bob Arým qazaqstandyq boksshy Jánibek Álimhanulynyń (5-0, 2 KO) bolashaǵyn joǵary baǵalaıdy, dep habarlaıdy Sports.kz.
- Men Álimhanulynyń Gennadıı Golovkınniń izbasary bolatynyna senemin, ol da Qazaqstannan. Jánibek - keremet boksshy jáne ony juma kúni keshkisin kóre alasyzdar, - dedi Arým 26 jastaǵy qazaqstandyq boksshynyń kezekti jekpe-jegi aldynda.
Aldaǵy aıqasyn Jánibek Álimhanuly 13 sáýir kúni tańerteń Los-Anjelestegi Staples Center arenasynda (AQSh, Kalıfornııa shtaty) ótkizedi. Qarsylasy - meksıkalyq Krıstıan Olıvas (16-4, 13 KO).
Bob Arým jaıly aıtar bolsaq, onyń negizgi klıenti WBA Super jáne WBO nusqalary boıynsha jeńil salmaqtaǵy álem chempıony, ýkraındyq Vasılıı Lomachenko (12-1, 9 KO). Ol bul keshte brıtandyq boksshy Entonı Krollomen (34-6-3, 13 KO) kezdesedi. Vasılıı jeltoqsandaǵy dıvızıonda biraýyzdan qabyldanǵan sheshim boıynsha Hose Pedrasýdy (25-2, 12 KO) jeńip, ekinshi belbeý ıesi atanǵan bolatyn.
