Prokýrorlyq tekseris nátıjesinde BQO densaýlyq saqtaý basqarmasynyń basshysyna sógis berildi

ORAL. QazAqparat - Prokýrorlyq qadaǵalaý aktisiniń qorytyndysyna sáıkes saladaǵy zańdylyqty baqylaýdy qamtamasyz etpegeni úshin BQO densaýlyq saqtaý basqarmasynyń basshysy Qamıdolla Irmenov sógis túrindegi tártiptik jaýapkershilikke tartyldy.

Oblys prokýratýrasynyń aǵa prokýrory Álııa Denızbaevanyń búgin málim etkenindeı, tekserý barysynda tıisti lıtsenzııasyz zańsyz medıtsınalyq qyzmet atqarý, medıtsına mekemelerindegi bos oryndar jónindegi málimetterdi jasyrý, tegin medıtsınalyq qyzmet kórsetýdiń kepildendirilgen kólemi aıasynda turǵyndarǵa beriletin dári-dármekti aqyly negizde ótkizý sekildi zańbuzýshylyqtar anyqtalǵan. Budan basqa sanıtarlyq erejelerdi buzý, bıýdjettik qarjyny tıimdi paıdalanbaý derekteri belgili bolǵan.

Oblys prokýratýrasynyń alqa májilisinen keıin barlyq zańbuzýshylyqtar kórsetilip, Q.Irmenovti tártiptik jaýapkershilikke tartý jóninde oblys ákiminiń atyna usynys berilgen edi. Tutastaı alǵanda, atalǵan zańbuzýshylyqtarǵa jol bergen 23 adam ákimshilik, 51 adam tártiptik jaýapkershilikke tartylsa, sonyń ishinde beseýi qyzmetinen bosatyldy. Mysaly, Syrym aýdandyq ortalyq aýrýhanasy turǵyndarǵa tegin berilýi tıis dári-dármekti aqyly negizde ótkizgen. Osy derek boıynsha QR QK 361-babyna sáıkes (qyzmettik ókilettilikti teris paıdalaný) qylmystyq is qozǵaldy.