Prokýrorlyq qadaǵalaýdyń arqasynda zańsyz jerde ornalasqan meıramhana buzyldy
ASTANA. 6 sáýir. QazAqparat - Almaty qalasy prokýrorlyq qadalaǵaýynyń arqasynda sý qorǵaý jaǵalaýyndaǵy zańsyz jerde ornalasqan meıramhana májbúrli túrde buzyldy.
Bul týraly QazAqparat QR Bas prokýratýrasynyń baspasóz qyzmetine silteme jasap habarlaıdy.
«Uzaq ýaqyt boıy sý qorǵaý jaǵalaýynda ornalasqan «Sabantoı» meıramhanasyn májbúrlep buzý týraly prokýrordyń talabymen shyǵarylǵan sot sheshimi oryndalmaı kelgen. Sol sheshimniń negizinde, «Alma» JShS-ge atqarý paraǵy berilip, zańsyz salynǵan ǵımaratty óz esebinen buzý týraly atqarý isi qozǵalǵan edi. Keıinirek, sot aktisiniń oryndalmaýyna baılanysty Medeý aýdanynyń sot oryndaýshysy aýdan sotyna sot sheshiminiń tásili men tártibin ózgertip, úshinshi jaqtardyń kómegimen «Sabantoı» meıramhanasyn májbúrlep buzý jáne osyǵan jumsalǵan qarjyny «Alma» JShS men jaýapker O. Glýshevıchten óndirý týraly usynys engizgen bolatyn», - delingen baspasóz aıǵaǵynda.
Baspasóz qyzmetiniń habarlaýynsha, «Alma» JShS dırektory sot sheshimine, sot oryndaýshylardyń is áreketine qatysty QR Joǵary sotyna deıin kóptegen shaǵym túsirip, sondyqtan iske qatysty atqarýshylyq áreketter toqtatylǵan. Alaıda, keıinnen sot sheshimi dáleldi jáne zańdy dep tanyldy. Óıtkeni, sot sheshimi boıynsha meıramhana memleket menshigimen erekshe qorǵalatyn aımaqta ornalasqan ári Elbasynyń Kishi Almaty ózeniniń beldeýinde ornalasqan jerlerdi qorǵaý týraly talaptardy oryndaý maqsatyn kózdeıdi. «Sondyqtan da 2 jyldan astam ýaqyt oryndalmaǵan sot sheshimi prokýrorlyq qadaǵalaýdyń arqasynda júzege asyp, zańsyz salynǵan «Sabantoı» meıramhanasy májbúrli túrde buzyldy», -delingen baspasóz baıanynda.
