Prokýrorlardyń Halyqaralyq qaýymdastyǵyna múshe memleketterdiń Bas prokýrorlary Gaaga qalasynda bas qosty
ASTANA. Qyrkúıektiń 10-y. QazAqparat - 2010 jylǵy qyrkúıektiń 5-9 kúnderi aralyǵynda Nıderlandynyń Gaaga qalasynda Prokýrorlardyń Halyqaralyq qaýymdastyǵynyń (PHQ) 15-shi konferentsııasy ótti.
Bul týraly QR Bas prokýratýrasynyń Halyqaralyq qatynastar departamentinen málim etti.
Jyl saıynǵy konferentsııa «Shekaradan ótý» taqyrybymen ótti. Konferentsııa jumysyna halyqaralyq uıymdar, úkimettik emes sektorlar, akademııalyq orta men jeke adamdardy qosa alǵanda 250 qatysýshy memlekettiń ókilderi qatysty.
QR Bas prokýratýrasy alǵashqy jáne birden bir prokýrorlar uıymy bolyp tabylatyn - PHQ-nyń 1999 jyldan bergi uıymdyq múshesi.
1995 jyly úkimettik emes, beısaıası uıym retinde tanylǵan PHQ qazirgi ýaqytta álemniń 130 eliniń 1400-den astam jeke jáne 129 uıymdyq múshesin biriktirip otyr.
PHQ-nyń jyl saıynǵy konferentsııasy ártúrli elderdiń prokýratýra organdary úshin ultaralyq qylmyspen kúrestegi ózara is-qımyldar men ortaq kózqarastardy qalyptastyrý jolynda tıimdi alań bolyp tabylady.
Ótken konferentsııa barysynda adam saýdasy, uıymdasqan qylmys, múlikterdi qaıtarý, ózara quqyqtyq kómek pen boı tasalap júrgen qylmyskerlerdi ustap berý sııaqty máseleler talqylandy.
PHQ-nyń 15-shi konferentsııasyna QR Bas prokýrory Qaırat Mámı qatysyp, ol «Boı tasalap júrgen qylmyskerlerdi ustap berý» taqyrybymen ótken 4-shi plenarlyq sessııanyń spıkeri boldy.
2011 jylǵy qazan aıynda Astana qalasynda PHQ-nyń Ortalyq jáne Shyǵys Eýropa men Ortalyq Azııa elderiniń 6-shy aımaqtyq konferentsııasynyń ótkizilýine baılanysty Q.Mámı, osy elderdiń ókilderin atalǵan forýmǵa qatysýǵa shaqyrdy.
QR Bas prokýrory plenarlyq sessııa májilisterine qatysa otyryp Koreıa Respýblıkasynyń Bas prokýrory Djýngıý Kım myrzamen, Nıderlandy Koroldiginiń Ádilet mınıstri Ernst Hırsh Ballın myrzamen, Eýropanyń adam quqyqtary jónindegi sotynyń sýdıasy Egbert Maıer myrzamen, PHA-nyń taǵaıyndalǵan Bas hatshysy Roland de Krıýkpen jáne Eýroıýst ókilimen birqatar ekijaqty kezdesýler ótkizdi.
Taraptar ekijaqty yntymaqtastyq pen praktıkalyq ózara is-qımyldyń damý perspektıvalaryn talqylady.
PHQ-nyń Bas keńesshisi Elızabet Hoý hanymmen kezdesý barysynda 2011 jyldyń qazanynda Astana qalasynda PHA-nyń 6-shy aımaqtyq konferentsııasyn ótkizýge daıyndyq máseleleri talqylandy.
