Prokýrorlar jumys ýaqytynda «kóńil kótermeıtin» boldy
Sondaı-aq jumys babymen kelgen basshyny nemese tekserýshini kútip alyp, dastarhan jaıǵandar da jumystarymen qosh aıtysady. Elimizdiń Bas prokýratýrasy qabyldaǵan jańa baǵdarlamany Shymkentte oblys prokýrory Ibrahım Imanov tanystyrdy, dep habarlaıdy QazAqparat HAA tilshisi.
Qadaǵalaýshy organ ókilderiniń jumysyn júıeleýge baǵyttalǵan «Halyqqa arnalǵan prokýratýra» jobasymen tanysýǵa oblystyq máslıhattyń depýtattary men qadaǵalaýshy organ qyzmetkerleriniń otbasy músheleri qatysty. Jýyrda qabyldanǵan qujatqa sáıkes, endi jańadan qyzmetke taǵaıyndalǵan basshy birden óz komandasyn jasaqtaı almaıdy. Burynǵy qyzmetkerlerdi 6 aı merzimge deıin ornynan aýystyrýǵa quqyǵy joq. Prokýrorǵa syı-sııapat kórsetýdiń ózi zańsyzdyq bolyp esepteledi. Ujym ishinde toı toılap, shyǵyn shyǵarýǵa da tyıym salyndy. Onyń ornyna qoǵam úshin qaltqysyz jumys isteý mindettelgen.
«Prokýratýra organdarynda árbir taǵaıyndaýlar men jumystan bosatýdyń zańdylyǵy jan-jaqty tekseriletin bolady. Ádilsiz, soraqy faktiler tabylsa - buıryqtyń kúshi joıylyp basshysy jaýapqa tartylady. Sondaı-aq ujymnan aqsha jınaýǵa da tyıym salynady. ıAǵnı, tógip-shashyp dastarhan jaıýdy, jıyn jasaýdy qoıý kerek. Ujym qyzmetkerlerin biriktirýdiń basqa da tásilderi bar. Máselen, ujymdyq rýhty sportpen shynyqtyrý kerek. Budan bólek, basshy nemese tekserýshi kelse, olardy kútip alý, shyǵaryp salý, sol úshin aqsha jınaýǵa ruqsat joq. Prokýrorlarǵa kelgen adamǵa qonaq úı nemese páter jaldap, esebin tóleý, olardy aptalap, aılap tamaqtandyrý, tilin tabýdy tyıý talap etiledi. Eger ishki qaýipsizdik qyzmeti osyndaı keleńsizdikti anyqtasa, kelgen adam da, kútýshiler de jumystan aıyrylady», - dedi jańa baǵdarlamany túsindirgen I.Imanov.
Oblys prokýrorynyń sózinshe, qadaǵalaýshy organ qyzmetkerlerin gazet, jýrnaldarǵa májbúrli túrde jazdyrýǵa da jol berilmeıdi. Sebebi, mundaı basylymdardyń bir jyldyq jazylý baǵasy 10 myń teńgeden asyp ketken. Bul qarapaıym prokýrordyń qaltasyna ájeptáýir salmaq bolary anyq. Ibrahım Imanov sonymen qatar prokýrorlarǵa qadaǵalaýdaǵy ózge organdardan nemese bıznesmenderden qaǵaz suraýdy doǵaryp, Bas prokýror oblystardy keńse taýarlarymen qajetti mólsherde qamtamasyz etýdi tapsyrǵanyn atap ótti.
«Prokýratýra qyzmetkerleri arasynda kerek emes kezekshilikti alyp tastaý tapsyryldy. Buǵan deıin qyzmetkerler jumys ornynda túnep júrgen. Kezekshilikke senbi, jeksenbi kúnderi de shyǵatyn edi. Qazir aqparattandyrýdyń naqty algorıtmi jazylýda. Oǵan telefondar men poshta júıesin paıdalaný tapsyryldy. Sonymen qatar, aımaqtarda saǵat 18:00-den keıin jáne demalys kúnderi jınalys ótkizýge tyıym salyndy. Basshylar jumys kúnin tııanaqty josparlaýdy úırenýi qajet. Basshylarǵa qyzmetkerlerge qamqor bolý tapsyryldy. Naqty sebep bolsa ǵana jumysta qaldyrý tapsyryldy. Jumys soǵan berilgen ýaqytta istelýi qajet. Sodan keıin qyzmetkerlerge otbasylaryna nemese sportzalǵa barýyna jaǵdaı jasalatyn bolady. Jaqyndaryn qýantsyn, balalarǵa kóńil bólsin, úılenbegender otbasyn qursyn», - dedi oblys prokýrory.
Jańa baǵdarlama jańa mindetter júkteıdi. Endi oblystyń prokýratýra qyzmetkerleri osy baǵdarlamaǵa saı jumys isteýdi josparlap otyr. Bul óz kezeginde qadaǵalaýshy organ jumysyn jandandyrýǵa negiz bolmaq. Ári jumysyna júrdim-bardym qaraıtyn mamandardyń qysqartýǵa iligýi de ǵajap emes.
«Atalǵan 10 qadam - barlyǵy óte jaǵymdy. Bul óz kezeginde prokýratýranyń taza bolýyna shaqyrady. Sondaı-aq, basqa organdar da osy prokýratýradan úlgi alsyn dep jasalǵan jumys dep bilemin»,- deıdi burynǵy prokýror, qazirgi oblystyq máslıhattyń hatshysy Qaırat Balabıev.