Prokýrorlar jalǵan kásipkerlikke tosqaýyl qoıyp, 6,9 mlrd. teńgeni bıýdjetke qaıtardy
ASTANA. QazAqparat - Prokýratýra organdary ózge de quqyq qorǵaý jáne fıskaldyq organdarmen birlesip jalǵan kásipkerlikke tosqaýyl qoıý boıynsha jumystar júrgizip keledi, dep habarlady prokuror.gov.kz.
Qabyldanǵan sharalardyń nátıjesinde aǵymdaǵy jyldyń ótken kezeńinde prokýrorlardyń aryzdary boıynsha jalǵan kásipkerlik belgileri bar 197 zańdy tulǵanyń memlekettik tirkeýiniń kúshi joıyldy, 115 aryz sottardyń qaraýynda jatyr. Memlekettik tirkeýiniń kúshi joıylǵan zańdy tulǵalardyń kontragentterine qadaǵalaý aktileri boıynsha memlekettik kiris organdary 31 mlrd. teńge kiristi qaıta eseptedi, búgingi tańda olardyń 6,9 mlrd. teńgesi bıýdjetke qaıtaryldy. Sonymen qatar, Bas prokýratýranyń arnaıy prokýrorlarynyń óndirisindegi jalǵan kásipkerlik faktisi boıynsha tergelip jatqan qylmystyq istiń sheńberinde 4,2 mlrd.-tan astam teńge kólemindegi salyqtyń memleket kirisine óndirilýi qamtamasyz etildi. Memlekettiń ekonomıkalyq múddelerin qamtamasyz etý jónindegi jumystar prokýratýra organdarynyń erekshe baqylaýynda.
