Prokýrorlar S. Ahmetovtyń isi boıynsha úkimdi ózgerissiz qaldyrýdy surady
«Sottalýshylarǵa qatysty quqyqtyq biliktilik bóligindegi sottyń úkimi zańdy ári negizdi bolyp tabylady. Sottalýshylardyń kinási qylmystyq is materıaldarymen ádil dáleldendi. Sottalýshylardyń kináliligi sot úkiminde jan-jaqty keltirildi jáne bul jetkilikti bolyp tabylady ári osyny qylmysty jasaýdaǵy kinásin moıyndaýy úshin jetkilikti dep sanaımyz», - dedi apellıatsııalyq sot alqasynyń otyrysynda sóılegen sózinde memlekettik aıyptaýshy Medeý Jaqanov.
Sonymen qatar, memlekettik aıyptaý tarapy barlyq sottalýshylardyń jazasy ádil dep sanaıtyndyqtaryn alǵa tartty. Prokýrorlar birinshi ınstantsııadaǵy úkimdi buzýǵa qatysty eshqandaı sebepterdi qarastyrmaıdy.
Sonymen bir mezgilde, prokýrorlar eki sottalýshyǵa - Qaraǵandynyń burynǵy ákimi Aıdar Telǵarın men «QazAgrofınans» AQ kredıt jáne lızıng departamentiniń dırektory Erlan Qısyqovqa qatysty múlikti tárkileýdiń zańsyz taǵaıyndalǵanyn da moıyndaıdy. Sodan soń, prokýrorlar qosymsha jaza túrlerin alyp tastaýdy da surady.
«QR QK 2 bólimi 307-babyna (qyzmettik ókilettigin asyra paıdalaný) sáıkes, sanktsııa mundaı jaza túrine qarastyrylmaıdy», - dedi memlekettik aıyptaýshy.
«Qalǵan bólikterinde úkim ózgerissiz qaldyrýǵa jatady, sottalýshylar men olardyń qorǵaýshylarynyń apellıatsııalyq shaǵymy - qanaǵattandyrylmaıdy», -dep túıindedi M. Jaqanov.
Sottyń appellıatsııalyq qaýlysy 14 naýryzǵa saǵat 16-00-ge taǵaıyndalyp otyr.
Buǵan deıin de habarlaǵanymyzdaı, 10 naýryzda Qaraǵandy oblysy sotynyń apellıatsııalyq ınstantsııasy burynǵy premer-mınıstr S. Ahmetov pen basqa da jaýapty tulǵalardyń isi boıynsha shaǵymdardy qaraýǵa kirisken bolatyn. Barlyǵy sotqa advokattardan jáne 12 sottalýshydan 25 shaǵym túsip, olar úkimdi buzýdy jáne jazany ishinara jeńildetýdi surady. Sot otyrysyn Qaraǵandy oblystyq sotynyń qylmystyq ister jónindegi sot alqasynyń tóraǵasy Rashıd Nurmaǵambetov, sýdıalar Svetlana Mınochkına men Roza Nurmuhanova júrgizýde.
Aıta keterligi, apellıatsııalyq shaǵym qaralǵanǵa deıin sottalýshylar tarapynan keltirilgen materıaldyq zalal tolyǵymen, shamamen 2,3 mlrd. teńgege ótelgen. Advokattardyń málimetinshe, qarajatty S. Ahmetovtyń týystary men dostary quıǵan.
Eske salaıyq, Qaraǵandy oblysynyń qylmystyq ister jónindegi mamandandyrylǵan aýdanaralyq sotynda burynǵy premer-mınıstr S. Ahmetov pen basqa da laýazymdy tulǵalarǵa qatysty is boıynsha sot úkimi byltyrǵy jyly 11 jeltoqsanda jarııalanǵan bolatyn.
Úkimge sáıkes, burynǵy premer-mınıstr S. Ahmetov QR QK-niń 176-babynyń 4-bóliginiń «b» tarmaǵy (senip tapsyrylǵan bóten múlikti ıelenip alý nemese ysyrap etý), QR QK-niń 310-babynyń 3-bóligi (kásipkerlik qyzmetke zańsyz qatysý), QR QK-niń 307-babynyń 3-bóligi (qyzmet ókilettigin teris paıdalaný), QR QK-niń 310-1-babynyń 3-bóligi (zańdy kásipkerlik qyzmetke kedergi keltirý) boıynsha kináli dep tanyldy. Qylmystardyń jıyntyǵy boıynsha, QR QK-niń 58-babynyń 3-bóliginiń negizinde, onsha qatań emes jazany neǵurlym qatań jazaǵa sińirý arqyly onyń múlki tárkilenip, memlekettik organdarda laýazymdy qyzmet atqarý quqyǵynan 5 jylǵa aıyryla otyryp, 10 jyl merzimge bas bostandyǵynan aıyrý jazasy taǵaıyndaldy. Jazany jalpy rejımdegi túzeý kolonııasynda óteıtin boldy.
Qaraǵandy oblysynyń burynǵy ákimi B. Ábdishev QR QK-niń 310-babynyń 3-bóligi (kásipkerlik qyzmetke zańsyz qatysý), QR QK-niń 307-babynyń 3-bóligi (qyzmet ókilettigin teris paıdalaný), QR QK-niń 310-1-babynyń 3-bóligi (zańdy kásipkerlik qyzmetke kedergi keltirý) boıynsha kináli dep tanyldy. Qylmystardyń jıyntyǵy boıynsha, QR QK-niń 58-babynyń 3-bóliginiń negizinde, onsha qatań emes jazany neǵurlym qatań jazaǵa sińirý arqyly, onyń múlki tárkilenip, memlekettik organdarda laýazymdy qyzmet atqarý quqyǵynan 5 jylǵa aıyryla otyryp, 5 jyl merzimge bas bostandyǵynan aıyrý jazasy taǵaıyndaldy. Jazany jalpy rejımdegi túzeý kolonııasynda óteıtin boldy.
Qaraǵandy oblysy ákiminiń burynǵy birinshi orynbasary Ǵ.Muhambetov 176-babynyń 4-bóliginiń «b» tarmaǵy (senip tapsyrylǵan bóten múlikti ıelenip alý nemese ysyrap etý) boıynsha kináli dep tanylyp, onyń múlki tárkilenip, memlekettik organdarda laýazymdy qyzmet atqarý quqyǵynan 5 jylǵa aıyryla otyryp, 3 jyl merzimge bas bostandyǵynan aıyrý jazasy taǵaıyndaldy.