Prokýrorlar Qazyǵurt aýdanyndaǵy 4 myń 506 jasóspirimniń quqyqtaryn qorǵady
ASTANA. 18 naýryz. QazAqparat /Qanat Mámetqazyuly/ - Ońtústik Qazaqstan oblysy Qazyǵurt aýdandyq prokýratýrasy 31 bilim berý uıymdarynda kámeletke tolmaǵandardyń quqyqtarynyń qorǵalýyna tekserý júrgizip, birqatar jaıtty anyqtady.
Bul týraly QazAqparat Bas prokýratýranyń baspasóz qyzmetine silteme jasap habarlaıdy.
Atap aıtqanda, tekserýler barysynda aýdandyq 10 mektepte temperatýralyq rejım múldem normaǵa saı kelmeıtindigi, mektepterdiń synyp bólmelerinde temperatýra 13,0-14,0 gradýs, al bastaýysh synyp bólmelerinde tipti 12,5 gradýs ekendigi anyqtalǵan. Bul kórsetkish Qazaqstan Respýblıkasy Densaýlyq saqtaý mınıstrliginiń 25.10.2010 jylǵy №834 buıryǵynyń 7-bóliginiń 48-tarmaǵyna múldem saı kelmeıdi. Tekserý nátıjesimen, 3 mektep basshylyǵyna uıǵarymdar berilip, mektepterdegi qazandyqtardyń kúshi tez arada kóbeıtilip, barlyq mekteptiń jylýǵa jaýapty 10 qyzmetkerlerine qatysty QR Ákimshilik quqyq buzýshylyq týraly kodeksiniń 323-babynyń 1-bóligimen ákimshilik hattamalar toltyrylyp, 219 myń 240 teńge mólsherinde aıyppuldar salyndy. Budan bólek, aýdandyq prokýratýra aýdan ákiminiń atyna joldanǵan usynysty qaraý nátıjesinde barlyq mektepterdiń temperatýralyq rejımi normaǵa sáıkestendirilip, 12 tulǵa tártiptik jaýapkershilikterge tartyldy.
Jalpy alǵanda prokýratýranyń aralasýymen aýdandaǵy 4 myń 506 jasóspirimniń quqyqtary qorǵaldy.
