Prokýrorlar balalar úılerin túngi ýaqyttarda syrttaı baqylaýǵa kóshti
ASTANA. KAZINFORM – Kazinform agenttiginiń BIZDIÑ ORTA podkastynda QR Bas Prokýrorynyń orynbasary Jandos Ómirálıev prokýratýranyń qoǵammen baılanysyn jaqsartý baǵytynda qandaı oń qadamdar jasalǵanyn aıtty.
– Burynǵy kezeńderde quqyq qorǵaý jáne prokýratýra organdarynyń qyzmeti kóbine qatań qylmystyq qýdalaýmen baılanystyrylyp, halyq arasynda alańdaýshylyq týǵyzýy múmkin edi. Alaıda búgingi tańda prokýratýra múlde jańa sıpatqa ıe. Qazir bul organ – azamattardyń quqyqtaryn qorǵaýǵa, ádilettilikti qalpyna keltirýge baǵyttalǵan senimdi qurylym, – dedi Jandos Ómirálıev.
Onyń aıtýynsha, prokýratýra organdary qylmys pen quqyq buzýshylyqqa tosqaýyl qoıý baǵytynda jumys júrgizip jatyr.
– Osyǵan baılanysty biz azamattarmen baılanysty barynsha nyǵaıtýǵa tyrysamyz. Bul úshin birneshe tetik qarastyrylǵan. Birinshiden, bes jyldan astam ýaqyt qyzmet etip kele jatqan azamattardy qabyldaý ortalyǵy bar. Mundaı ortalyqtar Bas prokýratýrada jáne barlyq óńirlerde jumys isteıdi. Olar turǵyndarǵa quqyqtyq kómek kórsetedi. Ekinshiden, IT-tehnologııalardy damytyp jatyrmyz. Qazirgi tańda prokýratýranyń Sall-center jáne áleýmettik jelilerdegi resmı paraqshalary bar. Osy arnalar arqyly kez kelgen azamat tikeleı Bas Prokýrordyń atyna ótinish joldaı alady, – dedi Jandos Ómirálıev.
Ol qazirgi kezde prokýrorlar qoǵamdaǵy máselelerdi óz betimen zertteýge erekshe kóńil bólip otyrǵanyn jetkizdi.
– Іri kásiporyndarǵa baryp, ondaǵy jumysshylarmen kezdesemiz. Jalaqynyń ýaqytyly tólenýi, eńbek qaýipsizdigi jaǵdaıyn qarastyramyz. Qarttar úıleri men balalar mekemelerine de baramyz. Balalar úılerine keıde keshki nemese túngi ýaqytta syrttaı baqylaý júrgizemiz. Bul rette jetkinshekterdiń quqyqtarynyń qanshalyqty qorǵalyp jatqanyn nazarda ustaımyz. Sondyqtan shaǵymdy kútpesten, qoǵamǵa ózimiz shyǵyp, azamattardyń muń-muqtajyna nazar aýdaryp kelemiz, – dedi Bas Prokýrordyń orynbasary.
Osyǵan deıin Bas prokýratýra aktıvterdi qaıtarý zańy kúshine engennen beri qansha aqsha syrtqa shyǵarylǵany týraly aıtqan edi.