Prokýrorlar azamattyq-quqyqtyq daýlar jónindegi sottarǵa ózderiniń qatysýyn qysqartady

ASTANA. QazAqparat - Qazaqstanda keıbir azamattyq isterde prokýrorlar ózderiniń qatysýyn qysqartady. Bul týraly búgin Ortalyq kommýnıkatsııalar qyzmetindegi baspasóz máslıhatynda Bas Prokýratýranyń Sottarda memleket múddesine ókildik etý departamenti basshysynyń orynbasary Marat Ábishev málim etti.

«Bizde Azamattyq protsessýaldy kodekste ereje paıda boldy, ıaǵnı tatýlasý endi azamattyq protsesste sýdıalardyń maqsaty bolyp otyr. Osy oraıda tabystyrý sýdıasy paıda boldy. Ol qarastyryp otyrǵan osy istiń aıasynda medıatsııa rásimderin paıdalana otyryp, taraptardy tatýlastyra alady. Іsterdiń bólek sanattary úshin daýdy mindetti retteý qarastyrylǵan. Sondyqtan da osy sharalardyń barlyǵy isterdiń tórt sanaty boıynsha prokýrorlardyń qatysýyn qysqartýǵa múmkindik berdi», - dedi Marat Ábishev.

Osy oraıda kóshirý, jumys ornynda qaıta qalpyna keltirý, jalaqyny tóletý, ómiri men densaýlyqqa keltirilgen zııandy óteý isteri eskerilip otyr. Prokýrorlar men kodekske ózgeristerdi ázirleýshiler bul ister tek qana jeke quqyqtyq mánge ıe ekenine kelisip otyr.

«Bul turǵyda memleket múddesine tikeleı qatysty bolyp otyrǵan joq. Al Qazaqstan Konstıtýtsııasynyń 183 baby boıynsha prokýror sottarda memlekettiń ókili bolyp tabylady. Sondyqtan da qazirgi kezde prokýratýra organdarynda azamattyq protsesste bizdiń qatysýymyzdy qajet etetin isterdiń naqty sanattary bar», - dedi ol.

Aıta keteıik, «100 naqty qadam» Ult josparynyń 26-qadamynda Sot resimderin ońaılatý jáne sot protsesterin jedeldetý úshin azamattyq-quqyqtyq daýlar jónindegi sottarǵa prokýrordyń qatysýyn qysqartý, azamattyq is júrgizý kodeksine tıisti ózgertýler engizý qarastyrylǵan.