Prokýrorlar 220 sheteldik ınvestordyń problemasyn sheshti
ASTANA. KAZINFORM – Prokýrorlar 220 sheteldik ınvestordy problemasyn sheshti. Bul týraly Májilistiń Halyqaralyq ister, qorǵanys jáne qaýipsizdik komıtetiniń otyrysynda Bas prokýratýranyń Qoǵamdyq múddelerdi qorǵaý qyzmeti bastyǵynyń orynbasary Rızat Smaǵulov aıtty.
«Búgingi tańda biz 220 ınvestordyń, onyń ishinde Túrkııa, BAÁ, Germanııa, Sıngapýr, Qytaı, Reseı jáne Frantsııadan kelgen sheteldik ınvestorlardyń máselelerin sheshýge kómektestik. Olardyń Qazaqstan ekonomıkasyna qosqan úlesi - 2,7 trln teńge», - dedi ol.
Máselen, onyń dereginshe, Aqmola oblysynda ıspandyq ınvestor 3 jyl boıy jer ala almaı, naryqtan ketip qala jazdady.
«Bizdiń qoǵamdyq tyńdaý kezeńinen bastap jer ýchaskesin berýge deıingi súıemeldeýimizdiń arqasynda quny 63 mlrd teńge bolatyn joba saqtalyp qaldy. Almatydaǵy Indýstrıaldy aımaqta 26 ınvestor Energetıka basqarmasy kelispegendikten bir jarym jyldan astam gazben jabdyqtaýǵa qosyla almady. Negizder formaldi boldy – kásipkerler qosylýy tıis gaz qubyry ákimdikten paıdalanýshy bolyp tabylatyn Qaztransgazaımaqqa berilmegen. Alaıda, ákimdikte menshik ıesi retinde qosylýǵa óz betinshe kelisim berý múmkindigi bolǵan. Investordyń máselesi prokýratýra qadaǵalaý aktisin engizgennen keıin ǵana sheshildi, kináli adam jazalandy», - dedi ol.
Rızat Smaǵulovtyń málimetinshe, Abaı oblysynda 2021 jyly sıngapýrlyq ınvestor «Qazaqtsement» zaýytyn 7 mlrd teńgege satyp alǵan. Kásiporyn qıyn jaǵdaıda bolǵandyqtan ınvestor bul jobaǵa qosymsha 17 mlrd teńge ınvestıtsııa salǵan. Alaıda 2 jyldan keıin «Qazaqtsement» 19 mln teńge qaryz bolǵan jeke kásipkerdiń talap-aryzy boıynsha mámile jaramsyz dep tanyldy.
Bul zaýyttyń jumysyn toqtatyp, ınvestordyń ketýine ákelýshi edi. Prokýratýranyń ótinish haty boıynsha apellıatsııalyq satydaǵy sot tsement zaýytyn satyp alý-satý shartyn jaramsyz dep taný týraly birinshi satydaǵy sot sheshiminiń kúshin joıdy. Sonyń arqasynda sıngapýrlyq ınvestor 25 mlrd teńge salǵan óndiristi saqtap qaldy. Al Pavlodarda ákimdik oblys ortalyǵynyń bas jospary ózgerýine baılanysty sút ónimderin óndiretin zaýytty tolyǵymen qala shetine kóshirýdi zańsyz talap etken frantsýzdyq ınvestor Laktalıstiń problemasy sheshildi. Osy ýaqytqa kásipker zaýytqa 1,5 mlrd teńge salǵan.
«Mundaı faktiler Qazaqstannyń ımıdji men bedeline nuqsan keltiredi. Bul jaǵymsyz mysaldardyń bir bóligi ǵana. Jalpy, atalyp ótken jańa fýnktsııa aıasynda prokýrorlar laýazymdy tulǵalardyń is-áreketterine quqyqtyq baǵa bere otyryp, ınvestıtsııalyq protsesterdi belsendi zertteıdi», - dedi ol.
