Prokýrordyń narazylyǵynan keıin oblystyq tennıs mektebi memlekettiń quzyrynda qaldy

ORAL. KAZINFORM – Batys Qazaqstan oblysy prokýrorynyń narazylyǵymen Qazaqstan Joǵarǵy soty jergilikti sottardyń sheshimderin buzdy. Bul dene shynyqtyrý jáne sport kafedrasyn memlekettik-jekeshilik áriptestik (MJÁ) kelisimi boıynsha oblystyq tennıs mektebin senimgerlik basqarýǵa berýge mindettedi.

Joǵarǵy Sot talaptardyń ákimshilik is júrgizý tártibinde qaralmaýy turǵysynan prokýratýranyń ýájderin negizdi dep tanydy. Mundaı mindetter boıynsha sheshim Bıýdjet kodeksiniń 163-babynda kózdelgendeı oblystyq maslıhattyń sheshimi negizinde qabyldanýy tıis.

Sonymen qatar, qol qoıylǵan MJÁ kelisimi bıýdjettik zańnamany buzdy. Óıtkeni ol maslıhattyń tıisti sheshiminsiz memlekettiń 900 mıllıon teńgeden astam qarjylyq mindettemelerin qarastyrdy.

- Kásipkerdiń jobaǵa qosqan úlesi nebári 5 paıyz bolsa, memlekettik jarna 95 paıyz boldy. Memlekettiń ekonomıkalyq múddelerine qaıshy keledi. Bul sondaı-aq Memleket basshysynyń Úkimettiń keńeıtilgen otyrysynda aıtqan prıntsıpin buzady, oǵan sáıkes MJÁ sheńberinde memleket pen jeke ınvestor múddeleriniń araqatynasy saqtalýy kerek, - delingen BQO prokýratýrasy habarlamasynda.

Osylaısha, Joǵarǵy Sot nysandy senimgerlik basqarýǵa berý zańsyz bolǵanyn rastady.

BQO-da sýbsıdııaǵa bólingen qarajat maqsatsyz paıdalanylǵanyn jazǵan bolatynbyz.