Prokýror ShQO ákiminiń burynǵy orynbasary Jaqsylyq Omardy 6 jylǵa sottaýdy surady
ÓSKEMEN. KAZINFORM – Óskemende Shyǵys Qazaqstan oblysy ákiminiń burynǵy birinshi orynbasary Jaqsylyq Omardyń isine qatysty ekinshi sot otyrysy ótti.
Sot barysynda memlekettik aıyptaýshy sýdıadan iske negiz bolǵan Camri kóligin tárkileýdi, Jaqsylyq Omardy memlekettik qyzmetten ómir boıyna shettetýdi, QR QK-niń 190-baby 3-bóliginiń 1, 2-tarmaqtary (iri mólsherdegi alaıaqtyq), 366-baby 3-bóliginiń 3-tarmaǵy (iri mólsherde para alý) boıynsha 6 jylǵa sottaýdy surady.
Al sóz alǵan ShQO ákimi birinshi orynbasarynyń advokaty sýdıadan bas bostandyǵyn aıyrmaý jazasyn qoldanýdy ótindi. Jaqsylyq Omardyń 7 balasy men qart ata-anasy baryn aıtty.
Aıyptalýshy bolsa óz kinásin tolyq moıyndaǵanyn, keltirilgen shyǵyn ótelgenin jetkizdi.
Aıta keteıik, 19 naýryzda Óskemen qalasynyń qylmystyq ister jónindegi aýdanaralyq sotynda Shyǵys Qazaqstan oblysy ákiminiń birinshi orynbasary Jaqsylyq Omarǵa qatysty sot protsesi bastalǵan bolatyn.
Aıyptalýshy 6 mln teńge para alǵanyn moıyndaǵan edi.
Eske salsaq, osyǵan deıin Túrkistanda veterınarııa salasynda 928 mln teńge jymqyrylyp, 4 adam qamaýǵa alynǵany habarlanǵan.
