Prokýror Perızat Qaıratty 10 jyl, anasyn 8 jyl bas bostandyǵynan aıyrýdy surady

ASTANA. KAZINFORM – Astana sotynda prokýrorlar «Birgemiz» qaıyrymdylyq qorynyń burynǵy jetekshisi, volonter Perızat Qaırat pen onyń anasy Ǵaını Alashbaevaǵa qatysty qandaı jaza suraıtynyn málimdedi.

Prokýror Arman Qyzyken sottalýshylarǵa qylmystyq jolmen tabylǵan múlikti tárkilep, naqty merzimmen bas bostandyǵynan aıyrý jazasyn taǵaıyndaýdy talap etti.

Aıyptaý tarapynyń ustanymy boıynsha:

Perızat Qaıratqa — 10 jyl bas bostandyǵynan aıyrý,

Ǵanı Alashbaevaǵa 8 jyl bas bostandyǵynan aıyrý jazasy suraldy.

Sonymen birge, memlekettik aıyptaý qylmystyq jolmen alynǵan qarajatqa satyp alynǵan múlikti tárkileýdi talap etip otyr. Tárkilengen múlikten túsken qarajat jábirlenýshilerge berilmek.

Tergeý aıasynda Perızat Qaırat pen Ǵanı Alashbaeva QR Qylmystyq kodeksiniń mynadaı baptary boıynsha aıyptalyp otyr:

190-bap, 4-bólim, 2-tarmaq — asa iri mólsherdegi alaıaqtyq;

218-bap, 2-bólim, 1-tarmaq — qylmystyq jolmen alynǵan aqshany jáne (nemese) ózge múlikti adamdar tobynyń aldyn ala sóz baılasýy arqyly zańdastyrý (jylystatý);

218-bap, 3-bólim, 3-tarmaq — asa iri mólsherde qylmystyq jolmen alynǵan aqshany jáne (nemese) ózge múlikti adamdar tobynyń zańdastyrýy (jylystatýy).

Buǵan deıin sottaǵy sózjarysta memlekettik aıyptaýshy Madına Orazalına Perızat Qaırattyń isi áleýmettik turǵydan sezimtal taqyryptardy bas paıdasyna qoldanýǵa tyrysatyndarǵa sabaq bolýy keregin aıtqan edi.

Eske sala ketsek, Perızat Qaırat daıyn dıplom satyp alǵysy kelgen áreketi týraly jazǵan edik. 

Sondaı-aq kýáger Perızat Qaırat qor qarjysyn qalaı qolma-qol aqshaǵa aýdarǵanyn aıtyp berdi. 

Sot barysynda áıgili ánshi, otandasymyz Dımash Qudaıbergenniń esimi ataldy.

Belgili bolǵandaı tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan. 

Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.