Prokýror men sýdıaǵa para beremin dep 5 mln teńge suraǵan advokat sottaldy
AQTÓBE. KAZINFORM — № 2 Aqtóbe qalalyq sotynda advokat R.Ǵabıtke qatysty is qaralyp, úkim shyqty. Sot úkimimen sottalýshy 4 jylǵa bas bostandyǵynan aıyryldy.
Advokatqa Qylmystyq kodekstiń «Alaıaqtyq», «Para berýge azǵyrý» baptary boıynsha aıyp taǵyldy. Sot jaryssózinde memlekettik aıyptaýshy sottalýshynyń ózine taǵylǵan aıypty ishinara moıyndaǵanyn aıtyp, túpkilikti 4 jyl 8 aıǵa bas bostandyǵynan aıyrýdy surady.
— Sottalýshy men jábirlenýshi bir-birin 2012 jyldan beri tanıdy. Onyń týǵan aǵasyna qorǵaýshy bolǵan jáne jábirlenýshiniń de qylmystyq isin biledi. 2025 jyly jábirlenýshi qylmystyq jazany jeńildetý týraly ótinishpen habarlasqan. Sol kezde is № 2 Aqtóbe qalalyq sotyna túsken. Olar jeltoqsan aıynda kezdesip, jazany jeńildetý úshin 5 mln teńge suraǵan. Sottalýshy eki mıllıon teńgesi prokýrorǵa, úsh mıllıon teńgesi sýdıaǵa beriletinin, sol kezde suraǵy oń sheshiletinin aıtqan. Alaıda sottalýshy óz sózinde eshkimge de aqsha berýge tyryspaǵanyn jetkizdi. Tek jábirlenýshini óz sózine sendirý úshin solaı aıtqan, — dedi prokýror.
Іs qujattaryn zerdeleý kezinde UQK Aqtóbe oblystyq departamenti qyzmetkerleriniń advokatty ustaý sáti kórsetildi.
Sot úkimimen sottalýshyny Qylmystyq kodekstiń 24-baby 3-bóligi, 190-baby 3-bóligi 1-tarmaǵy, 28-baby 4-bóligi, 367-baby 2-bóligimen aıypty dep tanyldy. Qylmystyq kodekstiń 24-baby 3-bóligi, 190-baby 3-bóligi 1-tarmaǵy boıynsha 3 jylǵa, 28-baby 4-bóligi, 367-baby 2-bóligimen 4 jylǵa bas bostandyǵynan aıyrý jazasy taǵaıyndaldy.
— Túpkilikti 4 jylǵa bas bostandyǵynan aıyrý jazasy taǵaıyndalsyn. Memlekettik qyzmette, sýdıa, jergilikti ózin-ózi basqarý salasynda, Ulttyq bank pen onyń vedomstvolarynda, qarjy naryǵyn retteý, baqylaý jáne qadaǵalaý organdarynda, avıatsııa salasynda, kvazımemlekettik sýbektilerde basshylyq qyzmette jumys isteý quqyǵynan ómir boıyna aıyrylsyn. Jazany óteý orny — qaýipsizdigi ortasha túzetý mekemesi, — dedi sýdıa S. Іzbaǵambetova.
Sottalýshynyń kinási jábirlenýshiniń sotta bergen jaýaby, jasyryn tergeý kezindegi aýdıo, vıdeo baılanys jazbalary arqyly dáleldendi. Sonymen birge sottalýshynyń kúdikti kezinde óz isin moıyndaǵany eskerildi. Ári tintý kezinde kólikten 5 mln teńge tabyldy. Sonymen birge zańsyzdyqqa jol bergeni úshin Aqtóbe oblystyq advokattar alqasynyń tóraǵasyna, oblystyq ádilet departamentiniń basshysyna jekeshe qaýly shyǵaryldy. Jábirlenýshiniń azamattyq talap aryzy qanaǵattandyrylmady. Sot úkimi zańdy kúshine engen joq.
Eske salsaq, Pavlodarda sot alaıaqtyq jasaǵany jáne laýazymdy tulǵalarǵa para berýge arandatqany úshin kináli dep tanylǵan advokatqa qatysty úkim shyǵardy. Sot oǵan 3 jyl 3 aıǵa bas bostandyǵynan aıyrý jazasyn taǵaıyndady.
