Prokýror Mataevtar isi jóninde: Sot tergeýi tolyq júrgizildi

ASTANA. QazAqparat - Bıýdjettiń myńdaǵan qarajatyn jymqyrdy jáne salyq tóleýden jaltardy dep aıyptalǵan Seıitqazy Mataev jáne onyń uly Áset Mataevtyń isi boıynsha sot úderisi aıasynda taraptardyń pikirsaıysy bastaldy.

«Aıyptaýshy tarap sot tergeýi tolyqqandy júrgizildi dep sanaıdy. Kýágerlerdi, japa shegýshilerdiń ókilderin, mamandar men sarapshylardy, aıyptalýshy Mataevtardy  jaýapqa aldyq, sonymen qatar qylmystyq is materıaldaryn zerttedik», - dedi prokýror Erjan Quraqbaev.

Memlekettik aıyptaýshy Seıitqazy Mataevqa asa iri kólemde bıýdjet qarajatyn jymqyrdy jáne salyq tóleýden jaltardy dep aıyptalǵanyn eske saldy.  Áset Mataevqa asa iri kólemde bıýdjet qarajatyn jymqyrdy degen kiná taǵyldy.  Sóıtip, memleketke jalpy somasy  529 mln. teńgeden asatyn zalal keltirildi.

Keıin prokýror qylmystyq istiń ár epızody boıynsha jeke toqtaldy.

Memlekettik aıyptaýshy Erjan Quraqbaev birinshi epızod boıynsha Seıitqazy Mataev qyzmettik babyn paıdalanyp, «Qazaqtelekom» AQ basqarma tóraǵasynyń orynbasary Batyr Mahanbetajıevtiń qoldaýymen áreket ete otyryp, «Ulttyq baspasóz klýby» QB tenderlik ótinishine satyp alatyn qyzmetter baǵasyn asyra jazǵan.

Úlken Mataev 2011-2013 jyldary aralyǵynda aldaý arqyly, ózine degen senimdi, qyzmettik babyn paıdalanyp, «Qazaqtelekom» AQ  143, 9 mln. teńge qarajatyn urlady dep sanaıdy tergeý.  Aıyptaýshylar Áset Mataevqa tıesili QazTAG memlekettik aqparattyq tapsyrysty zańsyz alǵanyn aıtýda. Sondaı-aq, QazTAG-ta jarııalanǵan materıaldar sany QR Mádenıet jáne aqparat mınıstrligi Aqparat jáne muraǵattar komıtetimen jasasqan shartta kórsetilgennen áldeqaıda az bolǵany anyqtaldy.

«2010 jáne 2015 jyldary aralyǵynda Mataev Seıitqazy jáne Mataev Áset aldaý arqyly, ózine degen senimdi, qyzmettik babyn paıdalanyp, Memlekettik satyp alýlar salasyndaǵy komıtettiń  169 mln. teńge  qarajatyn jymqyrdy», - dedi Erjan Quraqbaev.

Úshinshi epızodqa toqtalǵan memlekettik aıyptaýshy Seıitqazy Mataev kásipkerlik qyzmetten túsetin paıdanyń salyǵyn tóleýden jaltarý úshin «UBK» QB men Seriktestik arasynda keńse ǵımarattaryn jalǵa alý boıynsha jalǵan shart jasaǵanyn jetkizdi.  

«Ol paıda tabý maqsatynda túrli zańdy jáne ózge de tulǵalarmen Astana qalasyndaǵy Orynbor,8 meken-jaıynda jáne Almatyda Fýrmanov, 122 meken-jaıynda keńse ǵımarattarynyń sýbarendasy sharttaryn jasasty», - dedi prokýror.

Osylaısha, tergeý Mataev 2011 jyldan 2015 jylǵa deıin deklaratsııa bermeı, salyq tóleýden jaltardy jáne jalpy somasy 216, 9 mln. teńgeni quraıtyn salyq tóleý nysandaryn jasyrdy dep esepteıdi.