Prokýror London Olımpıadasynyń júldegerin 4 jylǵa bas bostandyǵyn aıyrýdy surady

PAVLODAR. KAZINFORM - Erkin kúresten Olımpıada oıyndarynyń qola júldegeri Dáýlet Shabanbaıǵa qatysty is boıynsha sot protsesi júrip jatyr. Jaryssóz barysynda prokýrorlar aıyptalýshyny 4 jylǵa bas bostandyǵynan aıyrýdy suraǵan.

Pavlodar qalasyndaǵy qylmystyq ister jónindegi aýdanaralyq sotta patrýl qyzmetkerlerine balaǵat sóz aıtyp, kúsh kórsetken Dáýlet Shabanbaıdyń isine qatysty sot protsesi ótip jatyr. 

«Sot kabıneti» jarııalaǵan materıaldarǵa súıensek, Dáýlet Shabanbaıǵa QR Qylmystyq kodeksiniń 380-baby 4-bóligi 1-tarmaǵy boıynsha aıyp taǵylǵan. Bul bap – eki nemese odan da kóp bılik ókiline kúsh qoldaný deregine qatysty. 

Іs materıaldarynda aıyptalýshynyń bıyl qyrkúıek aıynda Ulttyq ulannyń úsh áskerı qyzmetkerine kúsh qoldanǵany aıtylady. Keshki saǵat 21.00 shamasynda dámhana mańynda toqtatqan patrýlderdiń suraqtaryna balaǵatpen jaýap berip, kúsh kórsetken.

Atap aıtqanda bireýin keýdesinen ıterse, narıad bastyǵyn ıyǵynan qaǵyp jibergen.

Al úshinshisiniń kózine soqqy tıgen.

Sot jaryssózinde memlekettik aıyptaýshy sportshyny orta qaýipsizdik kolonııasynda tórt jylǵa bas bostandyǵynan aıyrý jazasyn taǵaıyndaýdy surady.

Dáýlet Shabanbaı sotta zardap shekkenderden keshirim suraǵan.

Buǵan deıin London Olımpıadasynyń júldegeri ustalǵanyn, kinási dáleldense, 3 jyldan 7 jylǵa deıin bas bostandyǵyn shekteý nemese aıyrý jazasy qoldanylýy múmkin ekenin jazǵanbyz.