Prokýror «Qorǵastaǵy» qandy oqıǵanyń jaı-japsaryn baıandap berdi
TALDYQORǴAN.QazAqparat - Almaty oblysyndaǵy "Qorǵas" shekara mańy yntymaqtastyq halyqaralyq ortalyǵynyń aýmaǵynda bolǵan jaıttyń jaı-japsaryn Panfılov aýdanynyń prokýrory Aıdyn Tórebekov baıandap berdi. Onyń aıtýynsha, kúdikti de jaraqat alǵan, dep habarlaıdy QazAqparat tilshisi.
Aýdan prokýrory A. Tórebekovtiń sózinshe, 4 maýsym kúni saǵat 15.00-de keýdesiniń sol jaq tusynan jaraqat alǵan Q. Tólegenovtiń denesi Panfılov aýdandyq ortalyq aýrýhanasyna jetkizildi. Panfılov aýdanynyń turǵyny aýrýhanaǵa jetkenshe jan tapsyrǵan. Ol Qorǵas ShHYO aýmaǵynda 1995 jyly týǵan D. Káripjanovpen eregesip, Káripjanov Tólegenovtiń keýde tusyna pyshaq salǵan. Oqıǵadan keıin kúdikti Káripjanov qamaýǵa alyndy. Qamaýǵa alý kezinde D. Káripjanovtyń oń jambasynda ashyq dene jaraqaty boldy. Onyń aıtýynsha, ol osy qaqtyǵys kezinde jaralanǵan. Bul fakti QR QK 99-baby birinshi tarmaǵy boıynsha sotqa deıingi tergeýdiń biryńǵaı tizilimine tirkeldi. Qazirgi tańda barlyq tergeý jumystary júrip jatyr, dep málimdedi aýdan prokýrory.
Qos azamattyń buǵan deıin tanys ekendikteri de belgili boldy. Olar Qorǵas ShHYO aýmaǵynda saýdagerlerdiń júgin tasymaldap, qyzmetterin kórsetip, nápaqalaryn taýyp júrgen.
