Prokýror Gúlmıra Satybaldyny 8 jylǵa bas bostandyǵynan aıyrýdy surady

ASTANA. QazAqparat – Elordada Gúlmıra Satybaldynyń isi boıynsha kezekti sot otyrysy ótti. Іsti qaraý barysynda prokýror aıyptalýshyny 8 jylǵa bas bostandyǵynan aıyrýdy surady, dep habarlaıdy QazAqparat tilshisi.

«Gúlmıra Satybaldyny Qylmystyq kodekstiń 389-baby 4-bóligi, 28-baby 3-bóligi jáne 125-baby 2-bóligi 1,8-tarmaǵynda qaralǵan qylmystyq quqyq buzýshylyq jasaǵany úshin kináli dep tanýdy suraımyn. Qylmystyq kodekstiń 389-baby 4-bóligi boıynsha – 6 jylǵa bas bostandyǵynan aıyrý, 28-baptyń 3-bóligi jáne 125-baptyń 2-bóligi 1,8-tarmaǵy boıynsha – múlkinen aıyrýsyz 8 jylǵa bas bostandyǵynan aıyrý taǵaıyndalsyn. Qylmystyq kodekstiń 58-baby 3-bóliginiń negizinde neǵurlym qatań jaza, ıaǵnı Satybaldynyń múlkin tárkileýsiz 8 jylǵa bas bostandyǵynan aıyrý taǵaıyndalsyn», - dedi prokýror Azamat Sársembaev.

Sondaı-aq, prokýror G. Satybaldy jazasyn qaýipsizdigi ortasha deńgeıdegi abaqtyda óteýin surady.

Eske salaıyq, G. Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergeýge alynǵan edi. Jábirlenýshige kelgen zalal somasy – 6,6 mlrd teńgeden asady.

Sondaı-aq, Gúlmıra Satybaldynyń sotqa deıingi tergeý kezinde shekara asyp ketpek bolǵany belgili boldy.