Prokýror Frantsııanyń eks-prezıdenti Sarkozıdi 7 jyl túrmege otyrǵyzý jazasyn surady
ASTANA. KAZINFORM – Frantsııanyń burynǵy prezıdenti Nıkolıa Sarkozıge 2007 jyly Lıvııanyń sol kezdegi kóshbasshysy Mýammar Kaddafıden zańsyz qarjylaı qoldaý aldy degen aıyp taǵylyp otyr, dep habarlaıdy Anadolý.
Frantsııa prokýratýrasy «Lıvııa isi» aıasynda burynǵy prezıdent Nıkolıa Sarkozıge 7 jyl bas bostandyǵynan aıyrý jazasyn, 300 myń eýro kóleminde aıyppul salýdy, sondaı-aq «sybaılas jemqorlyq, qylmystyq uıym qurý jáne saılaý naýqanyn zańsyz qarjylandyrý» aıyptary boıynsha 5 jyl saıası qyzmetpen aınalysýǵa tyıym salýdy talap etti.
Jergilikti BAQ-tyń málimetine súıensek, Sarkozı Parıj apellıatsııalyq soty aldynda jaýap berip jatqan «Lıvııa isinde» jańa oqıǵalar belgili bolǵan.
Prokýror Rodolf Jıýı-Bırman sot otyrysynda sóılegen sózinde Sarkozıge 7 jyl túrme jazasyn jáne 300 myń eýro kóleminde aıyppul salýdy talap etti. Bul shamamen 15 mln 975 myń túrik lırasyna teń. Sonymen qatar ol burynǵy prezıdentke 5 jyl saıası qyzmetpen aınalysýǵa tyıym salýdy surady.
Jıýı-Bırman Sarkozı jasaǵan áreketteriniń aýyrlyǵyna saı jaza alýy tıis ekenin aıtyp, oǵan basqa aıyptalýshylarmen birdeı qaraý qajet ekenin atap ótti. Prokýrordyń aıtýynsha, Frantsııanyń burynǵy prezıdenti qylmystyq uıymdy basqarǵan.
Sarkozıge jaqyn tulǵalardyń biri Klod Geanǵa qatysty 6 jyl bas bostandyǵynan aıyrý jazasy suraldy. Al burynǵy prezıdenttiń taǵy bir serigi Brıs Ortefege 4 jyl túrme jazasy, onyń 2 jylyn shartty túrde óteý usynyldy.
Prokýratýra Frantsııa men Lıvııa arasyndaǵy eki jemqorlyq jelisin basqardy dep aıyptalǵan Beshır Saleh pen Aleksandr Djýrıdi 6 jylǵa bas bostandyǵynan aıyryp, 4 mln eýro aıyppul salýdy talap etti.
Sot otyrysynan keıin baspasózge málimdeme jasaǵan Sarkozıdiń advokaty Krıstof Engren:
– Qorǵaý barysynda biz Nıkolıa Sarkozıdiń tolyq kinásiz ekenin dáleldeımiz, – dedi.
Engrenniń aıtýynsha, Sarkozı saılaýaldy naýqany kezinde Lıvııadan qarjy almaǵan.
– Nıkolıa Sarkozı kinásiz. Ol Lıvııa esebinen baıymaǵan jáne saılaý barysynda eshqandaı zańbuzýshylyq jasamaǵan, – dedi advokat.
«Lıvııa isi» boıynsha apellıatsııalyq tyńdaýlar 15 naýryzda Parıj apellıatsııalyq sotynda bastalǵan edi. Eki aptadan keıin aıaqtalady dep kútilip otyrǵan is boıynsha sheshim 30 qarashada jarııalanady.
Eske sala ketsek, buǵan deıin Nıkolıa Sarkozı sottan eki úkimdi biriktirýdi suraǵanyn jazdyq.
