Prokýror Erlan Bilálǵa 90 mln teńge aıyppul salýdy surady
ALMATY. QazAqparat - Muhtar Áýezov atyndaǵy Qazaq memlekettik akademııalyq drama teatrynyń eks-dırektory Erlan Bilálǵa qatysty sot talqylaýynda prokýror 90 mln teńge aıyppul salýdy surady, dep habarlaıdy QazAqparat tilshisi.
Memlekettik aıyptaýshy Erlan Biláldan alǵan parasynan 60 ese kóp aıyppul, ıaǵnı 90 mln teńge óndirip alýdy surady. Prokýror sonymen qatar, ony barlyq memlekettik marapattarynan aıyrý qajettigin jetkizdi.
Erlan Biláldiń qorǵaýshylary Qylmystyq kodekstiń 65-babyna silteme jasaı otyryp (kinásine ókiný-red), aıyptalýshyny qylmystyq jaýapkershilikten bosatýdy nemese prokýror suraǵan aıppul kólemin azaıtýdy surady. Advokattar qorǵaýyndaǵy adamnyń 4 balasy, onyń ekeýi kámelet jasqa tolmaǵanyn, asyraýynda nemeresi bar ekenin alǵa tartty.
Erlan Biláldiń ózi sotqa úkim shyǵararda onyń densaýlyǵynyń nasharlyǵyn jáne kinásin tolyq moıyndaǵanyn eskerýdi, múmkin bolsa, bas bostandyǵynan aıyrmaı, aıyppul kólemin azaıtýdy surady.
«Sezam» qoǵamdyq qaıyrymdylyq qorynyń prezıdenti Qaırat Baıanovtyń advokaty qorǵaýyndaǵy azamattyń materıaldyq shyǵynǵa qatysty eshqandaı shaǵymy joq ekenin, óıtkeni barlyq qarajat ótelgenin jetkizdi. Degenmen, Qaırat Baıanov keltirilgen moraldyq zalal úshin 1 mln teńge talap etetinin jetkizdi, biraq oǵan Erlan Biláldi qorǵaýshy tarap qarsy shyqty. Bul máselege qatystyń sottyń ustanymy úkim shyqqanda belgili bolmaq.
Aıta keteıik, tergeýshilerdiń málimeti boıynsha, Erlan Bilál «Sezam» teatrynyń jetekshisi Qaırat Baıanov 1,5 mln teńge para talap etken. Ol 2018 jyldyń 2 qańtarynda 600 myń teńge alǵan, 4 qańtarda paranyń qalǵan bóligin 900 myń teńgeni alyp jatqanynda qolǵa tústi.
