Prokýror egizderin óltirgen erli-zaıyptyǵa qatal jaza taǵaıyndaýdy surady
ALMATY. QazAqparat - Almatyda ótip jatqan qylmystyq istiń sotynda prokýror egizderin óltirip, tuńǵyshyn qańǵyrtyp jibergen erli-zaıyptyǵa eń qatal jaza taǵaıyndalýyn surady, dep habarlaıdy QazAqparat tilshisi sot zalynan.
Sot aldynda ólgen balalardyń ata-anasy - 29 jastaǵy Ózbekstan azamaty Emıl Gılmýtdınov pen 34 jastaǵy Alla Volchenko jaýap berip jatyr. Olarǵa qatysty QR QK 99-babynyń 2-bólimi 1,3,7 (kisi óltirý) tarmaqtary jáne 119-baptyń 1 bólimi (qaraýsyz qaldyrý) boıynsha is qozǵalǵan.
«Emıl Gılmýtdınovty QR QK 99-baby, 1,2,3-bólimderi boıynsha ómir boıy bas bostandyǵynan aırylýyn suraımyn. Ol ózi istegen áreketine tolyq jaýap bere alatyn halde bolǵan. Al Alla Volchenkony 19 jylǵa bas bostandyǵynan aıyrýdy suraımyn», - dedi prokýror Esdáýletov.
Sonymen qatar, memlekettik aıyptaýshy ekeýin de ishimdikke qumarlyqtan májbúrli túrde emdeý týraly usynys aıtty.
Buǵan deıin Volchenkonyń qorǵaýshysy sottalýshynyń jazasyn jeńildetýge baryn salatynyn málim etti. Tergeýshi suraq-jaýap alý barysynda Volchenkonyń kúıeýiniń jospary týraly bilgenin aıtqan edi.
Eske sala ketsek, 11 qyrkúıek kúni jantúrshigerlik oqıǵa Túriksib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabylǵan . Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy. Qazirgi ýaqytta sot aldynda Qazaqstan azamatshasy Alla Volchenkomen onyń azamattyq nekedegi kúıeýi Ózbekstan azamaty Emıl Gılmýtdınov jaýap berýde. Olarǵa qatysty QR QK 99-babynyń 2-bólimi 1,3,7 (kisi óltirý) tarmaqtary jáne 119-baptyń 1 bólimi (qaraýsyz qaldyrý) boıynsha is qozǵalǵan.
