Prokýror boıjetkendi qaǵyp óltirgen avtobýs júrgizýshisin 2,5 jylǵa sottaýdy surady
ALMATY. QazAqparat - Almatyda prokýror boıjetkendi qaǵyp óltirgen №126 avtobýs júrgizýshisin 2 jyl 5 aıǵa bas bostandyǵynan aıyrýdy surady, dep habarlaıdy QazAqparat tilshisi.
Sot protsesi Áýezov aýdandyq sotynda júrip jatyr.
«Sizden sottalýshyny QR QK 345-babynyń, 3-bóligimen aıypty dep tanyp, 2 jyl 5 aıǵa bas bostandyǵynan, 5 jylǵa kólik aıdaý quqyǵynan aıyrýdy suraımyn», - dedi memlekettik aıyptaýshy.
Aıta keteıik, avtobýs júrgizýshisiniń qorǵaýshysy Álim Mustapaev sýdıadan ony shartty túrde jazalaýdy suraǵan edi.
«Meniń qorǵaýymdaǵy adamnyń úsh balasy, áıeli bar. Jaldamaly páterde turady. Olar japa shekken tarappen kelisimge keldi. Moraldyq, materıaldyq shyǵyndy ótedi. Ony shartty túrde sottaýyńyzdy suraımyn», - dedi qorǵaýshy.
Jol apaty bıyl 18 sáýir kúni Saıran vokzalynyń mańynda bolǵan edi. 24 jastaǵy boıjetkendi №126 avtobýs júrgizýshisi týra qıylysta qaǵyp ketken. Soqqydan qyz birshama jerge ushyp túsip, alǵan jaraqatynan sol jerde kóz jumdy.
