Prokýror bloger Janabylov pen áıelin 4 jylǵa sottaýdy surady
ASTANA. KAZINFORM — Astanada erli-zaıypty blogerler Erbolat Janabylov pen Elmıra Tólegenovaǵa qatysty qylmystyq is boıynsha sot tergeýi aıaqtalyp, jaryssóz kezeńi bastaldy.
Jaryssóz barysynda memlekettik aıyptaýshy Oljas Haırýllaev sottan Erbolat Janabylovty Qazaqstan Respýblıkasy Qylmystyq kodeksiniń 214-baby 2-bóligi 2-tarmaǵy (zańsyz kásipkerlik) boıynsha kináli dep tanyp, múlkin tárkilep, 2 jyl 6 aıǵa bas bostandyǵynan aıyrýdy surady.
Sondaı-aq prokýror ony Qylmystyq kodekstiń 218-baby 2-bóligi 1-tarmaǵy (qylmystyq jolmen alynǵan aqshany zańdastyrý) boıynsha kináli dep tanyp, múlkin tárkilep, 4 jylǵa bas bostandyǵynan aıyrýdy ótindi.
— Qylmystyq kodekstiń 58-baby negizinde túpkilikti 4 jylǵa bas bostandyǵynan aıyrý jazasyn taǵaıyndaýdy suraımyn, — dedi memlekettik aıyptaýshy.
Budan bólek, prokýror sottan Janabylovqa qatysty úıqamaq túrindegi bultartpaý sharasyn ózgertip, ony sot zalynan qamaýǵa alýdy surady.
Al Elmıra Tólegenovaǵa qatysty memlekettik aıyptaý tarapy Qylmystyq kodekstiń baptarynyń jıyntyǵy boıynsha múlkin tárkileı otyryp, 4 jylǵa bas bostandyǵynan aıyrý jazasyn taǵaıyndaýdy usyndy.
Sonymen qatar prokýror Qylmystyq kodekstiń 74-baby 1-bóligine sáıkes, jazany oryndaýdy bir jylǵa keıinge qaldyrýdy surady.
Buǵan deıin sot Janabylovtardyń isin prokýratýraǵa qaıtarýdan bas tartqan edi.
