Prokýror Atyraýdaǵy bútin bir otbasynyń ólimine sebep bolǵan janjaldyń qashan, qalaı bastalǵanyn aıtty

Máseleniń máni tereńde jatyr. Sultan Sarsemalıev pen Aqbaıan Muqanǵalıeva 2016 jyly tanysyp, 20 mamyrda zańdy túrde úılenedi. Úılengennen keıin jas otbasy Sultan Sarsemalıevtiń ata-anasymen birge Mahambet aýdanynda turǵan. 2016,2018,2021,2022,2024 jyly týǵan balalary bar. Tergeý barysynda 2022 jyly Aqbaıan Muqanǵalıeva úsh balasyn alyp, Qyzylqoǵa aýdanyndaǵy áke-sheshesiniń úıine demalysqa ketip qalǵan.

— Demalysta bolǵan kezde Muqanǵalıevanyń anasy Óteshqalıeva Mahambet aýdanyndaǵy ata-enesiniń qolynda turýǵa qarsy bolyp, qaladan jalǵa úı alyp, januıasymen birge sonda turýdy talap etken. Ony estigen Sarsemalıev óz ata-anasyn tastap ketpeıtinin aıtyp, qaıyn jurtynyń talaptarymen kelispegen. Osy jaǵdaıdan keıin erli-zaıyptynyń arasynda kelispeýshilik týyndap, zańdy túrde ajyrasýǵa Mahambet aýdandyq sotyna aryzdanǵan, — dedi oblys prokýratýrasynyń basqarma prokýrory Mıras Baýyrjanov.

2022 jyldyń tamyzynda Muqanǵalıeva taǵy bir qyzdy dúnıege ákelip, sol kezden bastap ata-anasynyń ýaqytsha jalǵa alyp bergen Atyraý qalasyndaǵy úıde turyp bastaǵan. Sol jyldyń qarashasynda Mahambet aýdandyq sotynyń qaýlysymen Aqbaıan Muqanǵalıeva men Sultan Sarsemalıev zańdy túrde ajyrasqan. Sot sheshimi boıynsha balalar anasynyń qamqorlyǵynda qalǵan. 2023 jyly qańtarda Sarsemalıev januıasymen birge turý týraly sheshim qabyldaǵan. Áıeli men balalarynyń qasyna kóship kelgen.

2024 jyldyń sáýirinde Aqbaıan Muqanǵalıeva besinshi balasyna júkti bolǵan. Tamyzda Sultan pen Aqbaıan 4 balasyn ertip, Qyzylqoǵa aýdanyndaǵy ata-anasynyń úıine demalysqa barǵan. Sol kezde Aqbaıannyń ókpesine sýyq tıip, aýyra bastaǵan. Dárigerler oǵan pnevmotoraks dıagnozyn qoıyp, júkti kezinde ota jasalǵan.

— Muqanǵalıevanyń júkti bolýyna baılanysty ota óte aýyr jaǵdaıda ótken. 20 kún esin jımaı, koma jaǵdaıynda bolǵan. Osy sátte Qarabalın men Óteshqalıeva kúıeýbalalary Sarsemalıevti qalaǵa jibergen jaǵdaıda balalaryn óz ata-anasynyń úıine alyp ketedi degen oımen ony Muqanǵalıevanyń qasyna jibermeı, aýylda bolýyn talap etken. Osynyń saldarynan Sarsemalıevte qaıyn jurtyna degen óshpendilik, renish paıda bolǵan, — ol dedi sot otyrysynda

Osy jyldyń qyrkúıeginde Aqbaıan Muqanǵalıeva aýrýhanadan shyqqanmen, densaýlyǵy nasharlap, psıhıkalyq aýytqýlar paıda bolǵan. 2024 jyldyń jeltoqsanynda besinshi balasyn dúnıege ákeledi. Perzenthanadan shyqqan ýaqytta Aqbaıan men balalaryna kútim jasaıtyn eshkim bolmaı, Sultan olardy óz ata-anasynyń úıine alyp ketken.

— Keıin olar qalada páter jaldap turǵan. Osy kezde kúdikti Aqbaıan Muqanǵalıevanyń jaǵdaıyna baılanysty balalaryna kútim jasaýǵa úlgermeı, balalaryn Mahambet aýdanyndaǵy ata-anasyna jibergen kezde qaıyn jurtymen birneshe márte kelispeýshilikter bolǵan. Sarsemalıev jubaıynyń psıhologııalyq jaǵdaıy kúnnen kúnge nasharlap jatqandyqtan, 2025 jyldyń aqpan aıynyń 28-i men naýryz aıynyń 7-si aralyǵynda qaıyn aǵasy Naýryz Muqanǵalıevpen birge ony Ystanbul qalasyna emge aparyp kelgen. Alaıda Muqanǵalıevanyń jaǵdaıy jaqsarmaǵan, — dedi Mıras Baýyrjanov.

2025 jyly 7 naýryzda elge oralǵan Aqbaıan men Sultan Mahambet aýdanyna, al Naýryz Muqanǵalıev Qyzylqoǵa aýdanyndaǵy úıine ketken.

28 naýryzda Sultan men Aqbaıannyń bir ulynyń ókpesi qabynyp, Sultan balasymen birge oblystyq juqpaly aýrýlar aýrýhanasyna jatqan.

3 sáýirde ekeýi aýrýhanadan shyǵyp, Mahambet aýdanyndaǵy úıine barǵan. Osylaısha Sarsemalıev ata-anasymen birge tura bastaǵan.

— Muny estigen Naýryz Muqanǵalıev Sultanǵa habarlasyp, qaryndasy men balalardy qandaı da sebeppen aýylǵa óz ata-anasynyń úıine alyp ketip, sonda turyp jatqany jóninde másele qozǵaǵan. Óz kezeginde Sarsemalıev Naýryz Muqanǵalıevke qalada turǵan ýaqytta balalardy jáne Muqanǵalıevaǵa jalǵyz ózi kútim kórsete almaıtyndyǵyn aıtqan. Osydan keıin aralarynda kelispeýshilik bastalyp, sheshimin tappaǵan, — dedi prokýror.

14 mamyrda Sultan Sarsemalıev pen Naýryz Muqanǵalıev temirjol vokzalynda kezdesken. Sultan Naýryzǵa aýylǵa tolyqqandy kóship ketpegenin, januıasynyń jeke zattary men kıim-keshekteri ýaqytsha jaldaǵan úıinde turǵandyǵyn, aldaǵy ýaqytta qaıta kóship keletinin aıtqan. Soǵan Naýryzdyń aıtqandaryna kózin jetkizý úshin, jaldaǵan úıine baryp, kórý týraly usynys bildirgen.

— Úıge jetken Muqanǵalıev pen Sarsemalıev qonaq bólmede otyryp, aralaryndaǵy kelispeýshilikti talqylaǵan. Arty tóbeleske ulasqan. Óz kezeginde fızıkalyq turǵydan Naýryz Muqanǵalıevten álsiz ekenin, oǵan tıisti dárejede qarsylyq kórsete almaıtynyn túsingen Sarsemalıev qasaqana ony qazaǵa ushyratý úshin ashana bólmesine deıin artqa sheginip barǵan. Keıin ashanadaǵy pyshaqty alyp, Naýryz Muqanǵalıevtyń sol jáne oń jaq keýdesinen, ishinen soqqy jasaǵan, — dedi prokýror.

Osy jaǵdaıdan keıin Naýryz Muqanǵalıev tilge kelmesten kóz jumǵan. Qylmysty jasyrý úshin kúdikti qarańǵy túskenin kútip, jalǵa alǵan úıdiń ońtústik baǵytynda ornalasqan qabyrǵasynyń irgesinen 60 sm qashyqtyqta ornalasqan jerdi qazǵan. Tereńdigi 1 metr, eni 80 sm bolatyn shuńqyrdy daıyndaǵan.

— Muqanǵalıevtiń qaltasynan jeke kýáligin, Qazposhta bankomat kartasyn, quny 50 myń teńge bolatyn telefonyn, 3 myń teńgesin alǵan. Keıin onyń múrdesin kilemge orap, denesin súırep aparyp, ony tańǵy beske deıin kómgen, — dedi prokýror.

Keıin kilem men pyshaqty órtep jibergen. 15 mamyr kúndiz Túrkııa eline barǵanda banktik qosymshasyn paıdalaný kezinde qupııa sózin bilip alyp, 1 mln 698 myń, 19 mamyrda 150 myń, 21 mamyrda 2 mln teńgeden asatyn taýarlyq nesıelerdi rásimdep, birneshe jeke kásipkerlik sýbektisi arqyly qolma-qol aqshaǵa aınaldyryp, Naýryz Muqanǵalıevqa 4 mln 48 myń teńge kóleminde materıaldyq shyǵyn keltirgen. Sondaı-aq, marqumnyń múgedektigine baılanysty beriletin zeınetaqyny da jeltoqsan aıyna deıin alyp kelgen.

Budan bólek Naýryzdyń telefonyndaǵy What’s App qosymshasy arqyly Násip Óteshqalıevadan 350 myń teńge suraǵan. Aqshany Qyzylqoǵa men Atyraý qalasynda taksı qyzmetin kórsetetin azamat arqyly alǵan. Taksı júrgizýshisi qalaǵa kelgennen keıin aqshany termınal arqyly Naýryz Muqanǵalıevtyń nómirine salyp jibergen.

Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.

Keıin olardyń denelerinde pyshaq izderi bary belgili boldy.

9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeýbalasy Sultan Sarsemalıev ekeni resmı túrde belgili boldy.

Aqpan aıynyń basynda kúdiktiniń 5 balasy memleket qamqorlyǵyna alyndy.

Qandy qylmysqa qatysy bolýy múmkin degen kúdikke sol úıdiń qyzy da ilindi.

Keıin eki kúdiktiniń shetelde qalaı ustalǵany jóninde vıdeo jarııalandy.

Birneshe kúnnen keıin olar Atyraý qalasyna jetkizildi. 

Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.

Sot medıtsınalyq saraptamasynda jáne tergeý barysynda anyqtalǵan dálelderge sáıkes Naýryz Muqanǵalıevtiń 2025 jyldyń mamyr aıynda qaıtys bolǵany anyqtaldy. Al qalǵan úsheýi qarasha aıynda kóz jumǵan.

Budan buryn Sultan Sarsemalıevtiń qaıyn atasy men enesin qalaı óltirgeni belgili boldy

Sonymen qatar, Sarsemalıev sot otyrysynda isti alqa bılerdiń qaraýynan bas tartty.

Negizgi sot otyrysy 28 mamyr 10:00–de ótedi.

Aıta keteıik, búgin aldyn ala sot otyrysy ótip, prokýror kúdiktiniń qylmysty qalaı jasaǵanyn aıtty.