Prokýratýranyń tekserýi barysynda jalǵyz ǵana «Buqtyrma» sý qoımasynan arnaıy organda tirkelmegen 13 keme anyqtaldy
ASTANA. Sáýirdiń 8-i. QazAqparat /Aıdar Ospanalıev/ - Prokýratýra qyzmetkerleri arnaıy júrgizgen tekserýlerdiń barysynda túrli zańbuzýshylyqtarǵa jol bere otyryp, paıdalanylǵan 200 sý kóligin anyqtady.
Jalǵyz ǵana «Buqtyrma» sý qoımasynyń ózinen arnaıy organda tirkelmegen 13 kishigirim kemeler tabylǵan. Olardyń jaǵdaıy tekserý kezinde qaýipsizdik sharalaryna saı emes bolyp shyqty. Sondaı-aq sýdaǵy kólik qozǵalystarynyń qaýipsizdigin qamtymasyz etý maqsatynda prokýrorlar 39 kemeniń qozǵalysyna tyıym salǵan. Bul týraly búgin jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń sózine qaraǵanda, tekserý barysynda kólikti tirkeý men paıdalanýǵa, olardy arnaıy belgiler ilý, azamattarǵa sý kólikterin júrgizýge qajetti ruqsat berýge qatysty kóptegen kemshilikter anyqtalǵan. «Sonymen qatar, tekserýler barysynda sýda kemelerdiń júzýine kedergi keltiretin nysandar salý jaǵdaıy da anyqtaldy.
Tek 2008-2009 jyldary teńiz ben eldiń ishtegi sýlarynda arnaıy talaptarǵa saı emestigine qaramastan 17 nysan salynǵan nemese qaıta jóndeýden ótken. Elimizdiń quzyrly organ ókilderi osy ýaqytqa deıin Memlekettiń týy ilingen kemeni júrgizýge ruqsat berý tártibin daıyndamaǵan. Osyǵan baılanysty prokýratýra qyzmetkerleriniń usynystary negizinde Kólik jáne kommýnıkatsııa mınıstrligi atalǵan kemshilikterdiń ornyn toltyrý men oǵan kináli azamattardy jaýapqa tartý boıynsha tıisti sharalar qoldandy», dedi resmı ókil.
Onyń aıtýynsha, mınıstrlik sýdǵy kólik qozǵalysynyń qaýipsizdigin nyǵaıtý maqsatynda Kólikti baqylaý komıtetin uıymdastyrýshylyq jáne qurylymdyq jaǵynan nyǵaıtty. Sondaı-aq Memlekettik tý ilingen kólikti júrgizýdi retteýmen baılanysty qujat talaptaryn jetildirdi. Osy jumystar negizinde qazir teńiz jáne ózen aılaqtarynyń qyzmeti men mártebesin naqylaý jumystary josparlanyp otyr», dedi N.Súıindikov.
