Prokýratýranyń sheshimi boıynsha poıyzda janjal shyǵarǵandarǵa qatysty eshqandaı shara qoldanbaǵan polıtsııa qyzmetkeri sybaılas jemqorlyq baby boıynsha jazalandy
QARAǴANDY. 13 qańtar. QazAqparat /Valentına Elızarova/ - Jezqazǵannyń kólik prokýratýrasy poıyzǵa mas kúıinde otyryp, janjal shyǵarýshylarǵa qatysty aryz bergen jolaýshy azamatshanyń sózine qulaq aspaǵany úshin kóliktik polıtsııa qyzmetkerin sybaılas jemqorlyq baby boıynsha qyzmettik jaýapkershilikke tartty.
Bul týraly Jezqazǵannyń kólik prokýrory Nurǵalı Asqanbekov habarlady.
«Oqıǵa «Qaraǵandy-Jezqazǵan» baǵytymen júretin poıyz ishinde bolǵan. Jolaýshy áıel azamatsha Qaraǵandy-Sortırovochnaıa jelisi ishki ister bóliminiń polıtsııa qyzmetkerine kelip, oǵan balaǵat sózder aıtyp, tıise bastaǵan mas jolaýshylardy tynyshtandyrý týraly aryz aıtady. Polıtsııa qyzmetkeri qoǵamdyq tártip buzýshylarǵa qatysty shara qoldanýdyń ornyna, áıeldiń aryzyn jyrtyp, terezeden laqtyryp jibergen», - deıdi N.Asqanbekov.
Jezqazǵanǵa jetken soń azamatsha jazbasha túrde kóliktik prokýratýraǵa júginip, polıtsııa qyzmetkeri ústinen aryz beredi. «Tekserý qorytyndysy boıynsha aryzda aıtylǵan faktiler dáleldendi. Kóliktik polıtsııa qyzmetkeriniń is-áreketi jemqorlyq mazmundaǵy quqyq buzýshylyq, ıaǵnı shara qoldanýda tártip buzýshyǵa basymdyq bergendik dep baǵalandy», - deıdi prokýror.
