Prokýratýranyń «raqymshylyǵyna» narazy Shymkent turǵyny kóshege shyqty
ShYMKENT. QazAqparat - Shymkent turǵyny Amangeldi Qalybek búgin qala ortalyǵyndaǵy kóshege plakat ustap shyqty. Ol bir jyl buryn jol boıynda tórt jumysshyny kólikpen qaǵyp, bireýin mert qylǵan júrgizýshiniń bostandyqqa shyǵyp ketýine qatysty narazylyǵyn bildirýde, dep habarlaıdy «QazAqparat» HAA tilshisi.
Qoǵam belsendisiniń sózinshe, jol boıynda jylý qubyrlaryn tartyp jatqan sátte qaza tapqan Murat Álibek nebári 21 jasta bolǵan. Al ony baqılyq etken júrgizýshi bostandyqta júr.
«Men adamdarǵa osy jaǵdaıdy eske salý úshin shyǵyp otyrmyn. Bul mıtıng ne bolmasa narazylyq aktsııasy emes. Men osy eldiń azamaty retinde zańǵa bári baǵynsa deımin. Óıtkeni bul jerde adam ólip otyr. Bul tragedııa. Ol jáı emes, jumysyn istep, óz mindetin jasap jatqanda ajal qushty. Men ol jigitti tanymaǵanmyn. Týys ta emespin. Alaıda biz osy eldiń bir azamatyn joǵalttyq. Mundaı jaǵdaılar oryn ala berse ne bolady?»,- deıdi Amangeldi Qalybek.
Eske salaıyq, bir jyl buryn tańǵy altylar shamasynda jol boıynda qubyr tartý jumystaryn júrgizip jatqan tórt jumysshyny jeńil kólik qaǵyp ketken bolatyn. Mashınany tizgindegen Ismaıyl Súleımen qatty jyldamdyqpen júrip kele jatyp, rólge ıe bola almaı qalǵan. Tipti mashınasymen birge shuńqyrǵa qulǵan. Saldarynan úsh jumysshy jaraqat alyp, tórtinshisi qaza tapty. Júrgizýshi aýyr jaraqattar alyp, sol jerde mert bolǵan jábirlenýshi men jaraqattanǵan ózge úsh jumysshyǵa kómektesýdiń ornyna, oqıǵa ornynan boı tasalaǵan. Keıinen tártip saqshylary jas jigitke halyqaralyq izdeý jarııalady. Alaıda, ony ustaý múmkin bolmady. Onyń sol ýaqytta Qazaqstan aýmaǵynan shetelge shyǵyp ketkeni belgili boldy. Ol keıin polıtsııaǵa ózi kelgenimen, raqymshylyqqa iligip, bostandyqqa shyqqan. Bul týraly kúni keshe ǵana málim boldy.
«Raqyshylyq zańyna sáıkes, bul qylmystyq is amnıstııaǵa baılanysty toqtamǵa alynǵan. Jáne osy anyqtaýshylardyń sheshimimen kelisý úshin Ál-Farabı aýdandyq prokýratýrasyna joldanǵan. Al prokýratýra óz aldyna osy sheshimmen kelisti», - deıdi oblystyq ІІD baspasóz qyzmetiniń jetekshisi Saltanat Qarakózova.
