Prokýratýranyń birneshe sanktsııasy sot júıesine ótedi

ŞÝChЬE. QazAqparat - QR quqyq qorǵaý qyzmeti negizderin jańǵyrtý týraly jańa zań jobasyna sáıkes, kýálandyrý kepili, úlgilerdi alý jáne qupııa tergeý amaldary jónindegi úsh sanktsııa prokýratýradan sotqa ótedi, dep habarlaıdy QazAqparat tilshisi.

Bul týraly QR Bas Prokýrorynyń orynbasary Marat Ahmetjanov Býrabaıda ótken «Qazaqstandaǵy qylmystyq protsess: jańǵyrý joldary» konferentsııasynda málim etti.

«Qylmystyq protsestegi kóptegen sanktsııalar sotqa beriledi. Bul - 100 naqty qadam ult josparyn júzege asyrý bolyp sanalady. Qazir de kóptegen sanktsııalardy sot beredi. Endi kýálandyrý kepili, úlgilerdi alý jáne qupııa tergeý amaldary jónindegi úsh sanktsııa prokýrorlardan sotqa ótedi», - dedi QR Bas Prokýrorynyń orynbasary Marat Ahmetjanov Rixos Borovoe qonaq úıinde ótken jıynda.

M.Ahmetjanovtyń aıtýynsha, sanktsııany alý tártibi de edáýir ońtaılanady. Máselen, tintýge sanktsııa alý úshin tergeýshi prokýrorǵa habar beredi de, tikeleı sotqa barady. Munda prokýrordyń ókilettigine esh nuqsan kelmeıdi. Eger prokýror sanktsııamen kelispese, óz ustanymyn akt retinde sotqa joldaı alady. Sot arnaıy otyrys taǵaıyndap, prokýrordyń ótinishin qaraıdy.

Sondaı-aq, bostandyq quqyǵyna qatysty úsh sanktsııa prokýrorlar quziretinde qala bermek.

«Prokýror arqyly sotqa úsh sanktsııa barady. Olar: qamaýǵa alý, úı qamaq jáne ekstradıtsııalyq qamaý. Munda bostandyq quqyǵy qozǵalatyndyqtan, eshqandaı ońtaılandyrýǵa jol berilmeýi tıis. Atalǵan úsh sanktsııa boıynsha, mindetti túrde sot otyrystary ótedi, onda bári ashyq ári ádil bolady. Taraptardyń ótinishi bolsa nemese ózge de sanktsııalar týyndasa, sot otyrysynda qaralady», - dep óz sózin túıindedi QR Bas prokýrorynyń orynbasary.