Prokýratýranyń súıemeldeýimen júzege asqan 250-den astam joba boıynsha 30 myń jumys orny quryldy
ASTANA.KAZINFORM - Búgin Qazaqstan Respýblıkasynyń Bas prokýratýrasy men «Qazaqstandyq sheteldik ınvestorlar keńesi» qaýymdastyǵy (QShIKQ) arasynda yntymaqtastyq týraly Memorandýmǵa qol qoıýdyń saltanatty rásimi ótti.
QR Bas prokýratýrasynyń habarlaýynsha, qujatqa Qazaqstan Respýblıkasynyń Bas prokýrory Berik Asylov pen QShIKQ Basqarma tóraǵasy Erlan Dosymbekov qol qoıdy.
Іs-sharaǵa Bas prokýratýranyń, Syrtqy ister mınıstrliginiń, «KAZAKH INVEST» UK» AQ-nyń basshylyǵy, sondaı-aq QShIKQ Basqarmasy men Atqarýshy komıtetiniń músheleri qatysty.
Berik Asylov óz sózinde ınvestıtsııa tartý ulttyq mańyzy bar másele ekenin atap ótip, prokýratýra organdary «Zań men tártip» qaǵıdaty negizinde quqyqbuzýshylyqtarǵa áreket etýden bıznestegi problemalardyń júıeli aldyn alýǵa kóshýdi qamtamasyz etip otyrǵanyn aıtty.
Sońǵy úsh jylda kásipkerlerge qatysty tirkelgen qylmystyq ister sany 4 esege nemese 71,5%-ǵa qysqardy.
Bıyl 2025 jyldyń I toqsanymen salystyrǵanda bızneske kedergi keltirý faktileri boıynsha ákimshilik óndirister sany 3 esege (16-dan 50-ge deıin) ósti (QR ÁQBtK-niń 173-baby).
Bıznestiń quqyqtaryn qorǵaý tetikterin damytý tsıfrlandyrýmen jáne jasandy ıntellekt tehnologııalaryn engizýmen tyǵyz baılanysty qarastyrylyp jatyr, bul Memleket basshysy Qasym-Jomart Toqaev aıqyndaǵan strategııalyq baǵytqa sáıkes keledi.
Qazirgi ýaqytta prokýratýra organdary jalpy somasy 100 trln teńgeni quraıtyn shamamen 3 myń ınvestıtsııalyq jobany súıemeldeýde. Qabyldanǵan sharalardyń nátıjesinde 250-den astam joba iske qosylyp, 30 myń jumys orny quryldy.
- Memorandýmǵa qol qoıý halyqaralyq bıznes-qoǵamdastyqpen yntymaqtastyǵymyzdy sapaly jańa deńgeıge shyǵarady. Prokýratýra men Qaýymdastyq arasynda turaqty tikeleı baılanys arnasy qamtamasyz etilip, ákimshilik kedergilerdi jedel joıýǵa múmkindik beredi, – dedi Bas Prokýror.
QShIKQ Basqarma tóraǵasy Erlan Dosymbekov ashyq dıalogqa daıyndyq úshin alǵys bildirip, jańa ınstıtýtsıonaldyq qorǵaý tetikteriniń mańyzdylyǵyn atap ótti.
- Biz Bas prokýrorǵa Investıtsııalyq ombýdsmen fýnktsııalarynyń berilýin jáne profıldik komıtettiń qurylýyn joǵary baǵalaımyz. Bul – quqyqtardy qorǵaý kepildikterin nyǵaıtýǵa jáne halyqaralyq bıznestiń senimin arttyrýǵa baǵyttalǵan der kezinde qabyldanǵan júıeli qadam», – dedi Erlan Dosymbekov.
Taraptar Memorandým álemdik qoǵamdastyqqa Qazaqstannyń senimdi ıýrısdıktsııany qamtamasyz etetini, ozyq halyqaralyq tájirıbelerdi engizetini jáne ınvestorlar úshin turaqtylyqty kepildendiretini týraly aıqyn belgi bolatynyna senim bildirdi.
Saltanatty rásim Bas prokýratýranyń Investorlardyń quqyqtaryn qorǵaý jónindegi komıtetiniń, QR SІM Investıtsııalar komıtetiniń jáne «KAZAKH INVEST» qyzmetiniń tanystyrylymdarymen, sondaı-aq qatysýshylar arasynda pikir almasýmen aıaqtaldy.
Osyǵan deıin Astana prokýratýrasynyń ınvestorlarǵa qatysty 30-dan astam zańsyz sheshimdi toqtatqany týraly jazdyq.
