Prokýratýranyń yqpalymen Qostanaı oblysyndaǵy aýylda aýyz sý tarıfi 45 eseden astam tómendetildi
QOSTANAI. KAZINFORM – Qostanaı oblysynda Denısov aýdany prokýratýrasynyń sharalarynan keıin Glebovka aýyly turǵyndary úshin aýyz sýdyń tarıfi 45 eseden astam tómendetildi, dep habarlaıdy oblys prokýratýrasynyń baspasóz qyzmeti.
Buǵan deıin aýylda aýyz sýdyń bir tekshe metri 5 520,59 teńgeden satylǵan. Qabyldanǵan sharalardan keıin tarıf 116 teńgege deıin tómendedi.
Joǵary tarıf aýyl turǵyndary men kásipkerlik sýbektilerine aıtarlyqtaı qarjylyq salmaq túsirgen.
Zańnamada aýyz sýdyń qunyn sýbsıdııalaý qarastyrylǵanymen, Glebovka aýylyndaǵy sýmen jabdyqtaý qyzmetteriniń tarıfin tómendetý boıynsha tıisti sharalar ýaqtyly qabyldanbaǵan.
Prokýrorlyq qadaǵalaý aktisi qaralǵannan keıin Glebovka aýylyndaǵy aýyz sý tarıfi sýbsıdııalanatyn tarıfter tizbesine engizildi.
Nátıjesinde aýyldaǵy 430 turǵynnyń, onyń ishinde 21 kásipkerlik sýbektisiniń quqyqtary qorǵaldy.
Prokýratýra málimetinshe, tarıftiń tómendeýi halyq pen bıznestiń shyǵyndaryn edáýir azaıtyp, aýyz sýdy qoljetimdi etýge múmkindik berdi.
Prokýratýra azamattardyń quqyqtaryn qorǵaý jáne olardyń ómir súrý sapasyn jaqsartý baǵytyndaǵy jumysty jalǵastyrady.
Osyǵan deıin Batys Qazaqstan oblysynyń Terekti aýdanyndaǵy Alǵabas aýylynda prokýratýra qaıtarǵan aktıvter esebinen ortalyqtandyrylǵan aýyz sý júıesi iske qosylyp, 200-den astam abonent sapaly aýyzsýmen qamtylǵany týraly jazdyq.
