Prokýratýra jol-kólik apatynyń shynaıy statıstıkasyn kórsetetin «Apattylyq kartasy» ınteraktıvti jobasynyń tusaýyn kesti

ASTANA. 1 tamyz. QazAqparat - Búgin Bas prokýratýranyń Quqyqtyq statıstıka jáne arnaıy esepke alý jónindegi komıtetinde «Apattylyq qartasy» atty ınteraktıvti jańa jobanyń tusaý keseri boldy. Atalmysh portalǵa http://service.pravstat.kz/map.html elektrondy meken-jaıy arqyly kirýge bolady.

Quqyqtyq statıstıka jáne arnaıy esepke alý komıtetiniń prokýrory Rústem Ábdirahmanovtyń aıtýynsha, jańa jobany jasaýǵa elimizdiń joldarynda bolyp jatqan jol apattary, ólim-jitimder men túrli zardaptar sebep bolyp otyr.

«Máselen, 2010-2011 jyldary jol qozǵalystaryna júrgizilgen kólemdi prokýrorlyq tekserýler jol kólik oqıǵalary men olarda qaza bolǵandardyń sanyn jol polıtsııa organdary kóbine jasyryp kelgenin anyqtap berdi. Sondyqtan oǵan aldyn alý sharalary qoldanylmaǵan. Jol-kólik salasyndaǵy jaraqat pen ólim-jitimniń shynaıy statıstıkasyn júrgizý maqsatynda adamdardyń ólimine jáne jaraqat alýyna ákep soqtyrǵan jol-kólik oqıǵasyn esepke alý 2011 jyldyń shilde aıynan bastap Quqyqtyq statıstıka jáne arnaıy esepke alý jónindegi komıtetke júkteldi. Nátıjesinde jol apattarynyń kólemi tirkelgen málimetterge qaraǵanda áldeqaıda joǵary bolyp shyqty», - deıdi R. Ábdirahmanov.

Toqtala ketetin jaıt, prokýratýra esebi boıynsha ótken 7 aı ishinde jol-kólik oqıǵalarynyń sany ótken jylmen salystyrǵanda 49 paıyzǵa ósken.

«Jol apatynan zardap shekkender sany da artyp otyr. Mundaı málimetterdi kópshilik kúndelikti paıdalaný úshin jalpy jol-kólik statıstıkasynyń geografııalyq qartasy jasaldy. Endi adamdar qaza bolǵan nemese jaraqat alǵan jol-kólik oqıǵalary esepke alynyp, derekter qoryna engizilgennen keıin ol málimetti birneshe mınýt ótkennen soń-aq qartadan kóretin bolady», - deıdi R. Ábdirahmanov.