Prokýratýra jyl saıyn 1 mıllıonnan astam balanyń quqyǵyn qorǵaıdy
ASTANA. KAZINFORM – Balalardyń quqyqtary men zańdy múddelerin qorǵaý prokýratýra organdary qyzmetiniń basym baǵyttarynyń biri bolyp qala beredi.
Bas prokýratýranyń málimetinshe, jyl saıyn qadaǵalaý sharalarynyń nátıjesinde 1 mıllıonnan astam kámeletke tolmaǵannyń quqyǵy qorǵalady.
Qabyldanǵan sharalardyń nátıjesinde 1034 jetim bala turǵyn úımen qamtamasyz etildi. Sondaı-aq 1,3 myńnan astam jetim bala turǵyn úı alý kezegine qaıta qoıyldy.
Balalardyń qaýipsiz oqý ortasynda bilim alýyn qamtamasyz etý maqsatynda el boıynsha 17 myń bilim berý uıymyna tekserý júrgizildi.
Tekserý barysynda balalardyń fızıkalyq jáne aqparattyq qaýipsizdigine, sanıtarlyq-gıgıenalyq jaǵdaılarǵa jáne qarjylyq tártiptiń saqtalýyna qatysty kóptegen zań buzýshylyq anyqtalyp, joıyldy.
– Qabyldanǵan sharalardyń nátıjesinde 63 mekteptegi máseleler sheshilip, 31 myń balanyń oqýyna qolaıly jaǵdaı jasaldy, – dep habarlady vedomstvo.
Mektepterde beınebaqylaý júıeleri ornatylyp, olardyń basym bóligi polıtsııanyń jedel basqarý ortalyqtaryna qosyldy.
Sonymen qatar bilim berý uıymdarynyń kadrlyq quramy tekserildi.
Tekserý nátıjesinde buryn qylmys jasaǵan, sondaı-aq psıhonevrologııalyq jáne narkologııalyq esepte turǵan azamattar bilim berý uıymdaryndaǵy qyzmetinen shettetildi.
Jazǵy demalys kezeńinde balalar qaýipsizdigine erekshe nazar aýdarylyp otyr.
– Balalar lagerleriniń qyzmetin mindetti lıtsenzııalaý engizildi. Bul demalys oryndaryndaǵy qaýipsizdik talaptarynyń saqtalýyn baqylaýdy kúsheıtýge múmkindik beredi, – delingen málimette.
Balalardyń materıaldyq quqyqtaryn qorǵaý baǵytynda da júıeli jumystar júrgizilýde.
Prokýratýranyń aralasýymen alıment boıynsha 40 mlrd teńge bereshek óndirildi.
– Sońǵy jeti jylda alıment qaryzynyń jalpy kólemi 87 paıyzǵa qysqardy, – dep atap ótti Bas prokýratýra.
Jasóspirimder arasyndaǵy quqyq buzýshylyqtardyń aldyn alý maqsatynda profılaktıka jáne ońaltý tetikteri qaıta qaralyp, tárbıe jáne pedagogıkalyq jumystarǵa baqylaý kúsheıtildi.
Bas prokýratýra balalardyń quqyqtaryn qorǵaý, qaýipsiz orta qalyptastyrý, quqyq buzýshylyqtardyń aldyn alý jáne otbasy ınstıtýtyn nyǵaıtý baǵytyndaǵy jumystardy jalǵastyratynyn málimdedi.
Aıta keteıik, «Ulttyq qor – balalarǵa» jobasy aıasynda balalarǵa 2,3 mlrd dollar bólindi.
