Prokýratýra jeke sot oryndaýshylarynyń jasyrǵan tabysyn anyqtap, qosymsha salyq óndirdi

ASTANA. KAZINFORM — Jetisý oblysynyń prokýratýrasy júzdegen mıllıon teńgege jasyrylǵan kiristerdi anyqtady. 

Taldyqorǵan qalasynyń prokýratýrasy jeke sot oryndaýshylarynyń 2023 jylǵa arnalǵan 240.00 nysany boıynsha jeke tabys salyǵy boıynsha tapsyrylǵan deklaratsııada kiristerin aıtarlyqtaı tómendetý faktilerin anyqtady.

Mundaı «kóleńkeli» tájirıbe salyq zańnamasyn ǵana emes, adal salyq tóleýshilerge qatysty ádildik qaǵıdattaryn da buzady.

— Statıstıkalyq derekterge sáıkes, aıaqtalǵan atqarýshylyq óndiristerdiń naqty kólemi 896,1 mln teńge bolsa, al usynylǵan salyq deklaratsııalarynda bar bolǵany 231 mln teńge ǵana kórsetilgen. Aıyrmashylyq 665,1 mln teńge, — delingen habarlamada.

Qala prokýratýrasynyń engizgen usynýynyń nátıjesinde úsh jeke sot oryndaýshy qosymsha salyq deklaratsııalaryn tapsyryp, sonyń negizinde 2,6 mln teńge kóleminde qosymsha salyq tóledi.

Uqsas zań buzý  17 jeke sot oryndaýshysynda anyqtalǵan. Búgingi ýaqytta prokýrorlyq qadaǵalaý aktisin oryndaý maqsatynda ýákiletti organ jeke sot oryndaýshylarynyń salyq bereshegin óndirip alý sharalaryn qabyldap jatyr.

Aıta ketelik sot oryndaýshylarǵa AdiletGov mobıldi qosymshasy arqyly shaǵymdanýǵa bolady.