Prokýratýra jastarǵa jaqsy áke bolýdy úıretpek
Bul usynysty Úılestirý keńesiniń búgingi ótken otyrysynda Bas prokýrordyń birinshi orynbasary Iogan Merkel jarııa etti.
«Ana men bala problemalary týraly aıta otyryp, biz áke problemalaryn umyt qaldyrdyq. Otbasyn josparlaýǵa, áke bolýǵa jaýapsyz qaraýdyń ózi alıment tólemeýdiń basty sebepteriniń biri emes pe. Alımentti tólemeıtinderdiń 97% - bul er adamdar», - deıdi ol.
I.Merkeldiń oıynsha, qazirgi ýaqytta er balaǵa tıisti moraldyq tárbıe berý isi jolǵa qoıylmaǵan. Bul olqylyqtyń ornyn toltyrý úshin júıeli túrde sharalar atqarylý qajet, dep esepteıdi.
«Jasóspirimdi áke bolýǵa eshkim úıretpeıdi, daıyndamaıdy. Bar daıyndyq - bul bizdiń ákelerimizdiń úlgisi nemese eń kóp degende, olardyń keńesteri. Al eger ákesi joq bolsa nemese ol maskúnem, nashaqor bolsa she? Biz búgingi kúnge deıin bul problemany otbasy deńgeıinde qaldyryp keldik. Onyń aýqymyn eskere otyryp, áke bolý problemalaryn memleket saıasatynyń deńgeıine shyǵarý qajettiligi týyndady», - dep atap ótti spıker.
Aıta keteıik, bunyń aldynda habarlaǵanymyzdaı, Qazaqstanda alımentter boıynsha qaryz 2 mlrd. teńgege jýyqtaǵan. Búginde elimizde 350 myńnan astam bala alımentke muqtaj.