Prokýratýra Jambyl oblysynda qulaǵan «An-2P» ushaq apatynyń sebebin atady
ASTANA. QazAqparat - Qazaqstan Respýblıkasy Bas kólik prokýratýrasy 2015 jyldyń qańtar aıynda Jambyl oblysynda qulaǵan An-2P ushaq apatynyń naqty sebebin jarııalady.
«Qazaqstan Respýblıkasy Bas kólik prokýratýrasynyń arnaıy prokýror basshylyq etken tergeý toby 2015 jyly 20 qańtarda Jambyl oblysy «Shatyrkól» kenishiniń mańynda qulaǵan «OLIMP AIR» JShS áýe kompanııasynyń «An-2P» ushaq apatyna qatysty sotqa deıingi tergeýdi aıaqtady. Qazaqstan Respýblıkasy Investıtsııa jáne damý mınıstrliginiń vedomstvolyq Komıssııasy táýelsiz áýe mamandaryn tarta otyryp, apatqa sebep dep boljanǵan oqıǵalardyń barlyǵyn tekserdi. Anyqtalǵandaı, apatqa meterologııalyq jaǵdaı nashar kezde, ıaǵnı, tumandy aýa raıynda burys áreketter jasaǵan jáne jer baǵdarlaryn kórýge múmkindigi bolmasa da, ushý bıiktigin saqtamaǵan ekıpajdyń áreketi sebep bolǵan. Ushaq ishindegi bıiktikti ólsheıtin radıoólsheýish sóndirýli bolǵan», dep habarlady kólik prokýratýrasy. Ekıpaj músheleriniń barlyǵy qaza tapqandyqtan, áýe kemesin paıdalaný jáne qozǵalys qaýipsizdigin buzý baptary boıynsha ekıpaj múshelerine qatysty qylmystyq is toqtatyldy. Esterińizge sala keteıik, 2015 jyldyń 20 qańtarynda Jambyl oblysynda «An-2P» ushaǵy qulap, borttaǵy alty adam qaza tapsa, aýyr jaraqat alǵan Á.Shaıahmetova ǵana aman qalǵan edi.
