Prokýratýra úıdiń qulaǵandyǵy týraly jalǵan vıdeo taratqan azamatty anyqtady

Bul týraly Shyǵys Qazaqstan oblysy prokýratýrasynyń baspasóz qyzmetinen habarlady.
«Oqıǵa 24 mamyrda tirkelgen. Semeı qalasynyń turǵyny ǵalamtordan basqa elde úıdiń qulaǵany týraly vıdeony kórip, ony ǵalamtorda taratyp jibergen. Ol óziniń kompıýterinen «Shuǵyl. Tótenshe jaǵdaı. Eksklıýzıv. Qazaqstan. Semeı qalasy. Búgin kúndiz 14.23-te turǵyn úı qulady, 2017 jyldyń 24 mamyry» degen jazbamen vıdeony YouTube beınehostıngine jarııalaǵan. Taralǵan vıdeo halyqty dúrliktirdi», - dep habarlady quzyrly vedomstvodan.
Іshki ister organdary sotqa deıingi tergeý júrgizý barysynda vıdeony taratqan azamattyń kim ekenin anyqtaǵan. Qazirgi kezde tergeý aıaqtalyp, Semeı qalasynyń prokýratýrasy qylmystyq isti sotqa joldady.
Qadaǵalaý organy osy tektes aqparatty buqaralyq aqparat quraldary nemese telekommýnıkatsııa jelileri arqyly taratqany úshin Qazaqstan Respýblıkasy Qylmystyq Kodeksiniń 274-babyna sáıkes qylmystyq jaýapkershilik qarastyrylǵanyn eskertedi.