Prokýratýra: Túrkistan oblysynda 190 jer ýchaskesi zańsyz berilgen

ASTANA. KAZINFORM — Túrkistanda jer zańnamasynyń saqtalýy boıynsha alqa májilisi ótti, dep habarlaıdy oblys prokýratýrasynyń baspasóz qyzmeti.

Túrkistan oblysynyń prokýrory Murat Tleýberdıevtiń tóraǵalyǵymen alqa májilisinde jer zańnamasynyń saqtalýy jónindegi másele qaraldy. Májiliste tekserý barysynda anyqtalǵan zańsyzdyqtar men kemshilikterdiń sebep saldary talqylanyp, jergilikti ákimder tarapynan jiberilgen zań buzýshylyqtarǵa nazar aýdaryldy.

— Sońǵy 3 jyl ishinde (2023-2025 jj.) oblys kóleminde jergilikti atqarýshy organdarmen 6 myń gektardan astam (quny 1,8 mlrd teńge) 190 jer ýchaskeleri zańsyz tabystalǵany anyqtaldy. Bul rette, ákimder jer zańnamasynda kózdelgen konkýrs talaptaryn aınalyp ótip, baý-baqsha sharýashylyǵyn júrgizý, jeke qosalqy sharýashylyq jáne qosymsha jer tabystaý jolymen memleket jerlerin zańsyz ıelikten shyǵarǵany belgili boldy. Onymen qosa, 400 gektar jerdiń (150 jer ýchaskesi) nysanaly maqsaty zańsyz kásipkerlikke ózgertilgen. Birde bir jaǵdaıda sáýlet jáne qala qurylysy qujattamalarynyń talaptary saqtalmaǵan, — delingen habarlamada.

Otyrysta, zańsyz qurylystar, jeke turǵyn úı kezektiligi, jerlerdi utymdy paıdalaný máseleleri de talqylandy.

Májilis qorytyndysymen osy salaǵa jaýapty memlekettik organdarǵa tıisti hattamalyq tapsyrmalar berilip, zań buzýshylyqtarǵa jol bergen laýazym ıeleriniń jaýapkershiligin qaraý jóninde eskertildi.

Aıta keteıik, jer zańnamasynyń saqtalýy oblys prokýratýrasynyń qatań baqylaýynda. 

Budan buryn túrkistandyq belsendiler 11 jastaǵy qyzǵa azǵyndyq jasamaq bolǵan er adamdy áshkerelegenin jazǵan edik.