Prokýratýra temir joldaǵy kólikterden kóptegen zańbuzýshylyqtardy anyqtady
ASTANA. 12 qańtar. QazAqparat - Prokýratýra organdary temirjol kóligindegi qyzmet kórsetý áreketteriniń zańǵa sáıkestigin anyqtaý maqsatynda tekserý júrgizip,
kóptegen zańbuzýshylyqtardy anyqtady. Atalmysh zańbuzýshylyqtar jóninde búgin jýrnalıstermen bolǵan brıfıngte Bas prokýratýranyń resmı ókili Jandos Ómiralıev baıandady.
Onyń sózine qaraǵanda, zańbuzýshylyqtardyń basym bóligi tasymal qaýipsizdigi talaptaryna jaýap bermeıtin júk jáne jolaýshylar vagondaryn paıdalaný, naqty túrde kórsetilmegen qyzmet úshin tutynýshylardan zańsyz aqsha jınaý, tutynýshy quqyqtaryn buzý sııaqty árekettermen baılanysty. «Mysaly Qaraǵandyda «Qaztemirtrans» aktsıonerlik qoǵamy paıdalaný merzimderi buzylǵan 18 júk vagonyn paıdalanyp kelgen. Qyzmet kórsetý merzimderi ótip ketken, sondaı-aq sanıtarlyq pasporttary joq vagondardy paıdalaný men osyǵan uqsas faktiler 8 jolaýshylar poıyzynda anyqtaldy»,-deıdi resmı ókil.
Onyń málimetterine qaraǵanda, «Astana-Arqalyq» baǵytyndaǵy jolaýshylar poıyzynyń vagonynda elektr qondyrǵysynyń isten shyqqandyǵy anyqtaldy. Bul árekettiń sońy vagonnan órt shyǵyp, odan, adamdardyń zardap shegý jaǵdaıyna soqtyrýy múmkin edi. Óıtkeni vagona ne órt dabyly ne ishki baılanys joq. «Tekserý barysynda kórsetilmegen qyzmetter úshin tutynýshylardan aqsha alý faktileri anyqtaldy. Mysaly Aqtóbe jol bólimshesiniń ókilderi 21 sharýashylyq júrgizýshi sýbektisinen 220 vagondy tazalap jýǵany úshin quny 1 mıllıon 589 myń 353 teńge bolatyn qarjy óndirip alǵan. Al tekserý barysynda 125 vagonnyń múldem jýylmaǵandyǵy anyqtaldy. Osy tektes faktiler Qandyaǵash, Qyzylorda, Mańǵystaý, Jambyl jáne Qostanaı óńirlerinde de oryn aldy», - dedi J.Ómiralıev.
Onyń aıtýynsha, tekserý barysynda prokýrorlar anyqtalǵan zańbuzýshylyqtar boıynsha 92 usynys, 7 uıǵarym, 4 narazylyq engizip, 123 ákimshilik is júrgizý isterin qozǵaǵan.
