Prokýratýra sotqa deıingi is júrgizýdiń múldem jańa úlgisin ázirledi
ANA. 31 mamyr. QazAqparat /Qanat Mámetqazyuly/ - Búgin QR Bas prokýrorynyń birinshi orynbasary Iogan Merkeldiń tóraǵalyq etýimen Bas prokýratýra janyndaǵy Zańdylyqty qamtamasyz etý máseleleri jónindegi Qoǵamdyq keńestiń kezekti otyrysy bolyp ótti.
Onda sotqa deıingi is júrgizýdi reformalaý máselesi qaraldy.
«Prokýratýra tarapynan júrgizilgen saraptama bizdiń sot isin júrgizý isimiz áli de KSRO qylmystyq is júrgizý quqyǵy aıasyndaǵy eski qaǵıdattarǵa negizdelip otyrǵanyn kórsetti. Bul bıýrokratııamen tyǵyz baılanysty júıe bolyp tabylady ári qylmystyń udaıy ósýine ýaqytyly, tolyqqandy áreket etýge qaýqarsyz. Osyǵan oraı Bas prokýratýra sotqa deıingi is júrgizýdiń tujyrymdamaly jańa úlgisin usynady. Bul rette 7 negizgi baǵyttar boıynsha reformalar júrgizý kózdeledi», - dedi jıyndy ashyp sóz sóılegen bas prokýrordyń orynbasary Iogan Merkel.
Atap aıtqanda, jańa úlgi boıynsha qylmystyq is qozǵaý týraly qaýlydan bas tartý, tergeýshiniń aıyp taǵýyn alyp tastaý sekildi normalar qamtylatyn bolady. Budan bólek, sotqa deıingi is júrgizý túrlerin de reformalaý kózdeledi. Qazirgi qylmystyq is júrgizýdiń qoldanysynda negizinen sotqa deıingi úsh is júrgizý túrleri júzege asady. Bas prokýratýra bulardy biriktirip, bir ǵana is júrgizý máselesin qarastyrǵan. «Bundaı reformalar bizdiń qylmystyq is júrgizý úderisimizdi túbegeıli ózgertýdi kózdeıdi. Salanyń shapshańdyǵyn arttyryp qana qoımaı, bul jumysta ádilsottylyqtyń irgeli negizin buzbaý sharalary qarastyrylady», - dedi Bas prokýrordyń orynbasary.
Keńestiń jumysyna Parlament depýtattary, kórnekti ǵalymdar, «Nur Otan» partııasynyń ókilderinen turatyn Keńes músheleri qatysty.
